【韓國】壁畫村又點止梨花洞

文: KKday

2016.11.21

(圖片來源)

自從韓劇時不時偶然不經意咁出現左壁畫村之後，壁畫村就成為韓國旅遊嘅熱點項目，唔少人都特等走去影下相，做翻轉文青。究竟韓國壁畫村有幾多呢？等KKday幫你盤點幾個韓國比較特別嘅壁畫地段！

1. 梨花壁畫村 (Ihwa Maeul) - 首爾

由於梨花洞係韓國劇組經常取景嘅地方，加上有韓國當地綜藝節目介紹，令到梨花壁畫村成為全韓國最出名嘅壁畫村。自2006年開始，首爾政府推動「駱山藝術 2006」，同逾60位藝術家進行舊區美化。最近，梨花壁畫村部分街梯（兩條分別畫有花同魚嘅樓梯）暫時封閉，想去嘅朋友可以留意翻。

地址：首爾市鍾路區梨花洞

圖片來源

2. 行宮洞壁畫村 (Haenggung-dong Mural Village) - 水原

行宮洞壁畫村位於水原市北水洞一帶，屬於規模較細嘅壁畫村。北水洞一帶屬於市內嘅舊區，位處華虹門附近，大部分都係八十到九十年代左右嘅住屋。除咗壁畫之外，附近仲有兩間畫廊，包括Alternative Art Space Noon同埋Space Bom，對藝術有興趣嘅朋友不妨一去。

地址：京畿道水原市八達區北水洞232-3

圖片來源

3. 滋滿壁畫村 (Jaman Mural Village) - 全州

滋滿壁畫村同其他壁畫村一樣，有唔少藝術家同畫家進駐，比較特別嘅地方在於滋滿壁畫村有比較多嘅卡通人物壁畫。成個壁畫村依山而建，大部分嘅屋都位於山腰，感覺上同台北嘅寶藏巖差唔多，行到頂就可以睇到全韓國最大嘅韓屋村（全州韓屋村）。

地址：全羅北道全州市完山區滋滿洞1街1-10

圖片來源

4. 甘川文化村（Gamcheon Culture Village）- 釜山

甘川文化村位於山腳位置，係韓國規模比較大同多元化嘅藝術村，大家可以沿住梯級同巷弄慢慢探索充滿藝術嘅社區。入到文化村門口，可以喺附近嘅旅遊咨詢所買一張地圖，除咗可以方便參觀，仲可以玩遊戲添！反轉張地圖，就會發現係個儲印仔嘅遊戲，一路參觀一路吸印仔，儲齊仲可以換post card。睇壁畫之餘，記得參加村內嘅各種工作坊，帶走屬於大家嘅回憶！

地址：釜山廣域市沙下區Gamnae2路177-11 (甘川洞、天頂)

圖片來源

5. 松月洞童話村 (Songwol-dong Fairy Tale Village) - 仁川

松月洞自從仁川喺1883年對外開放港口嘅時候就已經存在，早期主要係外國人嘅聚居地，後期因為年輕人外流導致松月洞開始沒落。韓國政府為咗改善區域環境，就開始用童話故事去重新設計松月洞，形成今日嘅童話村。叫得童話村就梗唔少得公主同王子，當然仲有唔少大家由細睇到大嘅卡通人物，去嘅時候即管睇下自己認得幾多個！

地址：仁川廣域市中區童話村街38 (松月洞3街)一帶