日本旅遊攻略
有無人好似小編咁，成日搶機票都搶唔到來回飛，結果變Open jaw又怕穿州過省好麻煩?唔使擔心，因為小編已經幫大家開左路喇!跟住小編嘅行程就可以出發喇，Let’s Goooooo!
香港人去邊都好，最緊要部電話有得上網先。上網嚟講，小編首選一定係租wifi蛋嫁喇，夠哂方便唔使換電話卡，又可以幾個人share，一邊搭車一邊睇片都唔怕爆數據。
>>wifi蛋詳情
第一日 大阪-心齌橋-道頓堀
去到大阪，第一時間梗係衝去心齋橋同道頓堀啦! 行李比較輕便嘅，可以喺機場搭南海電鐵轉地鐵出市區，咁就最經濟實惠。但係如果你攜老扶幼，一家大細帶住幾件行李，想舒舒服服去酒店嘅，小編就建議你地搭>>【24小時機場接送】關西機場至大阪，半夜到埗都唔使瞓機場!
心齋橋係大阪最大嘅購物區，集齊哂香港人最愛嘅牌子，GU、UNIQLO又有，ABC MART都有，仲有好多其他大小精品店同服飾店。當然唔少得小編最愛嘅大阪燒同章魚燒啦!
仲有小編覺得貴但係又真係好好食嘅龍蝦包~好香牛油味啊~~~
唔好唔記得食埋大阪好出名嘅炸串!
炸得好脆又唔會好油，正!
由心齋橋可以行到去道頓堀，記得要同固力果小子影張相先好番酒店啊!
第二日 大阪-黑門市場-大阪城-京都
去東京要去築地市場，去大阪就一定要去黑門市場朝聖!
黑門市場有大量海鮮同刺身食，全部都好新鮮。
小編強推大大隻生蠔!!超級鮮甜，諗番起都流哂口水。
唔鍾意食生嘢?唔緊要，黑門市場仲有好多熟食同當造水果食。
即燒鯛魚，由日本婆婆燒，特別有風味。
食埋生果夠哂飽之後，就可以出發去大阪城同四天王寺觀光喇!
大阪城
交通:從新大阪車站出發經由 JR 大阪車站到大阪城公園約 13 分鐘。
四天王寺
交通:乘坐地鐵從新大阪車站到四天王寺前夕陽丘車站約 23 分鐘。
新世界係天王寺公園附近以通天閣為中心嘅街區，全部商鋪都好有特色。
色彩繽紛，忍唔住係咁影相。
新世界
交通:乘坐地鐵從新大阪車站到動物園前車站約 19 分鐘。
行完又差唔多時間出發去京都喇~
大阪 → 京都交通:
1.從大阪搭藍色JR京都線，到京都車站560日幣。
JR京都線共有3種車次:
新快速-只停靠 大阪、新大阪、高槻、京都 (約30分鐘)
快速 停靠 9 站 (約 45分鐘)
普通 每站停靠 (約 60分鐘)
所有車次都一樣價錢，想坐新快速記得睇清楚個資訊牌先好上車。
2.搭阪急京都線到京都河原町，400日幣
特急到河原町 - 約43分鐘
通勤特急到河原町 - 約44分鐘
快速急行到河原町 - 約45分鐘
快速到河原町 - 約51分鐘
準急到河原町 - 約64分鐘
傍晚由大阪出發去到京都，應該又開始肚餓嫁喇，係時候食好西。
香港人最愛嘅中村藤吉本店都係喺京都，不過6點半就閂門，京都駅伊勢丹店閂最夜，就揀佢啦!
京都駅店地址:JR京都駅西改札口前 スバコ･ジェイアール京都伊勢丹2F＆3F
本店地址:京都府宇治市宇治壱番十番地
如果想夜遊清水寺，要睇下夾唔夾到佢春、夏、秋三季指定夜間參拜日子。2016年就淨番秋季夜間參拜喇，日期由11月12號至12月4號，下就5點半至晚上9點都會有特別夜間參拜。
另外，想去京都倒數嘅朋友留意喇，清水寺12月31號當晚會喺夜晚10點開放夜間特別參拜，一直開到1月1號嘅下晝6點。
第三日 京都
唔好以為京都古色古香就無乜嘢食，其實一樣有美食市場~
玩到呢到又差唔多時間準備搭通宵巴士去福岡喇!搭通宵巴士嘅好處就係可以慳住宿慳時間，日本嘅夜行巴士好舒服，小編平時好易暈車浪都無事，抵搭!
Willer Express: 4900日幣起 (21:30京都發車~08:20到達博多)
更多詳情 >>官網
Bus Hikaku: 4000日幣起 (20:15京都發車~06:50到達博多)
更多詳情 >>官網
頭3日關西行程係咁多先~下集再同大家講埋接住4日九州嘅行程~
本篇圖文獲作者授權刊登，未經許可，請勿轉載。
【延伸閱讀】
UTravel熱門旅遊話題
↓即睇最新行程懶人包、爆紅打卡點🔥、必吃美食😋等↓
