悉尼玩命體驗高空歷奇＋懸崖游繩

2020.09.01

遊澳洲新南威爾士，悉尼歌劇院、Harbour Bridge 景色雖然百看不厭，但好動朋友總會預留時間跳出悉尼市中心，去到郊外藍山同 Central Coast 人在野一番！Tree Tops 歷奇公園有 1 公里長環型 zipline，40 個大迴旋轉到頭暈；藍山的 Adventure Company 有行山、懸崖游繩、溪降等刺激活動，貪玩族實唔會失望，瘋玩夠本！

Tree Tops 歷奇公園　挑戰世界之最

離悉尼市中心 2 小時車程的 Ourimbah State 森林，原始味 100 巴仙，冇水冇電，行山人士都唔會來，我哋去來做乜？實情是森林內的 Tree Tops 歷奇公園有條全球最長的 rollercoaster zipline！平時玩 zipline，參加者通常抓住條繩直綫高速滑過去，十幾至幾十秒已經玩完。Crazy Rider 則是 zipline 的變奏版，除了直綫，仲有 40 個大迴旋，如過山車一樣驚險！Crazy Rider 分兩部分，Xtreme 全長 1 公里，玩完全程要 5 分鐘，短的 Pioneer 都有 330 米長，滑晒成條要 1.5 分鐘。坐上特製的「尿片安全帶」，裝上齒輪即時起飛！

穿梭於林中，滑道同樹木的距離伸手可及，過程相當驚險，被半吊的我跟着慣性左搖右擺，好幾次以為會撞落棵樹，又或是雙腳會碰到樹枝，最後……當然係安全着陸。

玩完 Crazy Rider，可以 test 一下自己體力玩埋歷奇。呢個森林歷奇一啲都唔簡單，先要上堂理論課，因為歷奇上每個 task 都冇教練，上鎖、開鎖、裝齒輪等步驟都係自己搞掂，上到去萬一開唔到個鎖，又或者睇錯指示唔記得裝齒輪，冇人救到你，後果自負！歷奇體驗分藍、綠、紅、黑 4 個等級，完成所有約需 2.5 小時，絕對考體力。先來個小學雞 level 的藍同綠，約有 1 至 2 層樓高，輕鬆闖關。來到 level 3 的紅及黑色，目測離地有 8 層樓高，腳仔即時一軟。每個 task 難度升呢，獨木橋長咗，垂直樓梯高咗，仲有個 5 米高的繩網陣，隨時玩足 2、3 個小時。

Crazy Rider 唔畀帶相機，錶、手鏈、耳環等，隨身物品無一幸免，Go Pro 亦一定要夾在鐵杆上。

終點必定有職員隨時守候，確保安全。

以為全程輕輕鬆鬆坐着玩，實情係有幾個轉彎位充滿離心力，好刺激。

Tree Tops 位於森林內，經常有蛇出沒，尤其春夏季更要注意。

急轉彎，個心即時離一離。

紅色等級的歷奇路綫位於 5 層樓高，都咪話唔驚。

玩的時候一定要保持安全距離！不要跟車太貼啊！

Adventure Park 的小童歷奇區，夠 3 歲就可參加，多數係短距離 zipline，唔使體力又可練膽。

看似簡單的垂直木梯，搖擺不定，要邊爬邊靠腰力保持僅有的平衡，以免條梯愈爬愈搖。

Tree Tops 內每棵樹木都受到保護，鋼綫完全沒有破壞樹幹。

十分隱陣的安全鎖，唔可以 2 個一同開鎖，其中 1 個必須鎖住鋼綫，另 1 個先可解開。

玩 zipline 時，1 隻手摸住齒輪表面，另 1 隻手 hold 住紫色繩。

歷奇咁多個 tasks，見到呢個牌就代表 zipline 時間，記住裝上齒輪先好上路。

info

Tree Tops @ Central Coast

地址：Ourimbah State Forest, 1 Red Hill Rd, Wyong Creek (cnr Yarramalong Rd) NSW 2259, Australia

電話：+61 (0)2 4025 1008

開放時間：9am - 6pm

價錢：成人 Adventure Park AUD48；Crazy Rider-Pioneer AUD29；Crazy Rider-Xtreme AUD59

網址：www.treetops.com.au

交通：乘搭 2 小時火車至 Central Coast 的 Wyong 站，再轉乘的士

藍山游繩 + Bush Walking　吸收大自然香氣

悉尼市中心都望到藍山（Blue Mountains）的壯觀山脈，每次都係遠觀，何不親近藍山多少少，於山中的峽谷參加連《National Geographic》都推介的懸崖游繩（Abseiling）？大清早在 Blue Mountains Adventure Company 集合，收拾好行裝出發。全程 8 小時體驗由教練 Jason 帶路，愈往山中走，環境愈陰深，樹木、石頭濕氣極重。活動分 2 部分，上午挑戰 5 個游繩，下午 Bush Walking。先來個高約 3 米的小懸崖，傾斜度只有 60，一行 3 人輕易完成；之後經過 Grose Valley 的多個分支瀑布，真正的考驗才正式開始。一時要左腳踩住懸崖，右腳踩住條木游落谷底；一時又要徒手爪住垂直 90 度的懸崖爬行，仲要從巨石的隙縫跳落水流急速的小河中，差錯腳隨時冇命！

Lunch 過後，學澳洲人去 Bush Walking，邊燃燒卡路里邊欣賞峽谷美景。整個旅程在 Grose Valley 中遊走，沿途仲見到不少澳洲獨有生物及植物，如睇得唔食得的澳洲小龍蝦（Yabbie），同奶樽刷有 8 成似的班庫樹（Banksia），仲有酸過檸檬的澳洲土著水果 Bush Tucker……大自然的氣味撲面而來，泥土、河水、花朵……好醒神的香氣。