日本旅遊攻略
因為要返工，好想計劃定 weekend 可以去邊片空地攤吓，refresh 吓。因為懶，好想片空地近市區啲。於是，我就去搵配水庫。搵配水庫就等於搵到隱丘，因為水向低流，水源由水塘去濾水廠去抽水站去配水庫，再分發到周邊地區使用，所以專揀市內小丘興建，咁就啱哂喇！
全香港有 229 座配水庫，覆蓋面積都唔細，但由於地形、結構問題，174 座食水配水庫中，只有部分會變成遊樂設施，供市民使用。有啲會有康體設施，有啲會係足球、籃球場，有啲噴草籽植草就算。
01 | 離地油麻地山
▲ 油麻地一帶感覺紛紛擾擾，無諗過附近竟然有一片淨土，如果想忽爾避靜，首先你要征服 383 級樓梯！
▲ 在廣華醫院對岸、油麻地救護站旁，有條小天梯，氣來氣喘過後，上到小花園。
▲ 入口有間小白屋，牆上寫住 1934 年，但仲好新淨，明顯打理保養得宜。
▲ 休憩花園有片大草地同緩跑徑，草唔算長，不過比較混亂，當成散步徑好了。三面景色被密林遮閉，不過仲可以見到朗豪坊！呢度比平時嘅公園僻靜，入夜其實燈光唔強，睇星勉強，賞月就絕對無問題。
油麻地配水庫休憩花園
供水範圍：尖沙咀、旺角、油麻地、旺角及九龍西
前往方法：由窩打老道行到救護站旁，上三百多級樓梯直達
//延伸閱讀//
02 | 東何文田賞月位
▲ 東何文田配水庫容量全港最大，有成 152,411 立方米，上蓋亦足夠變成 2 個足球場，有餘。由佛光街斜路進入，上氣唔接下氣行 30 級樓梯，就見到入口有個真‧巨型草足球場！可惜，球場只供預訂場地人士使用。
▲ 只供預訂人士使用，咁山長水遠走上嚟做咩？繞過半場，見到涼亭再走前 100 米，就會見到個闊落嘅遊樂區，除咗有 200 米長嘅緩跑小徑、康體設施，重點係‥‥‥
▲ 重點係，喺兩排「屏風」中間望到何文田半山望出去嘅維港景！呢個位算係比較人煙罕至嘅眺望煙花景/ 賞月位，感覺有如空中花園。
▲ 配水庫倉門，可以係個文青打卡點。
東何文田配水庫遊樂場
供水範圍：九龍塘、尖沙咀、紅磡、油麻地、旺角及馬頭圍
前往方法：由佛光街轉入常樂街，可於常樂街公園旁的入口進入，或於佛光街、常樂街交界的洗手間旁進入
//延伸閱讀//
Pantone X Airbnb 營造 2017 年度之綠色叢屋
03 | 樂富後花園
▲ 樂富邨另一邊嘅聯合道公園旁，有段小斜路，明明路邊勁多廢氣，走大約 500 米左右林徑，四處密林，完全唔似屋邨後山，空氣好似清新啲。
▲ 嚟到一片大草地，草長過膝，偶有小花，最估唔到嘅係中間鋪有石磚路，為一大片亂草添層次，影相一流。
▲ 草地一邊係鐵絲網，攔封九龍塘、九龍城一帶景色；另一邊，是仰望到的獅子山。雖然靚景好吸引，但當然唔好試爬喇！
▲ 樂富配水庫同樣有倉門，1960 字樣標示年份。
樂富配水庫休憩花園
供水範圍：九龍塘及橫頭磡
前往方法：上聯合道，由聯合道公園旁的入口進入
UTravel熱門旅遊話題
贏走題樂園門票、酒店Staycation及人氣產品
立即探索🔍最新熱門活動📍好去處推介🌟
