日本旅遊攻略
又到年尾慶典時節，唔飛外地，近近哋都要去澳門玩一轉！除咗各大酒店燈飾，澳門大街小巷仲有4大活動等緊你，有年度盛事、打卡一流嘅【2025澳門國際光影節】，來自全球各地嘅燈光藝術團隊，呈獻28組裝置，分布於3大區域，仲有免費巴士往來唔同展區！另亦有戶外聖誕主題街區【繽紛聖誕新口岸】、文創老街光雕投影【幻彩夜關前】，同埋集食買攤位同親子遊戲於一身嘅【北區冬日市集】，節目體驗超豐富，即睇詳情！
①年度盛事 | 2025澳門國際光影節
澳門國際光影節一向係澳門年度重頭節目，亦係唔少人12月去澳門玩嘅理由！今年嘅光影節以「光繪•未來」為主題，喺南灣區、北區同新口岸區設下共28組燈光、互動及燈飾裝置，請來世界各地嘅光影藝術家發揮創意，包括來自澳門、中國內地、葡萄牙、韓國、澳洲同美國等地的團隊，打造出結合科技與藝術的作品，當中唔少仲融合咗社區活動同美食元素，完美呈現澳門歷史城區同創意城市美食之都魅力，連澳門本地人都特登嚟參加。
南灣區「星光・航路」
地點：長廊（連接南灣湖水上活動中心及南灣•雅文湖畔）、白帳篷、南灣湖湖面、南灣湖水上活動中心
擁有12個作品嘅南灣區，最搶眼的必數南灣湖水上活動中心「光之方舟」，由葡萄牙藝術家Emanuel Barbosa創作，光之帆船上滿載住多元文化，一齊駛向夢想星河！另一焦點作品白帳篷「十二星座圖譜」，出自澳門陸曦之手，遊客可透過互動裝置，揀選心願同祝福語句，然後將心願升上天幕 ；連同旁邊由北京的黃蔚欣主理的「雪絨星」，讓輕盈優雅的雪花在漆黑中綻放光芒，成個南灣區都好浪漫！
北區「綺光 ‧ 樂園」
地點：東方海岸休憩區、飛喇士街休憩區、筷子基北灣休憩區
北區的8個作品，大多同社區扣連，例如「光影自然」互動裝置，遊人可以透過手影互動，感受大自然中生靈氣息，結合澳門藝術家創作嘅投影叢林動畫，令社區更有活力！ 還有位於同區的「Accordion」，搶眼的彩色彩拱門由澳洲藝術家Amigo & Amigo以創作，以手風琴為靈感，象徵多元文化共融。 另外的「夜光塗鴉」，更直接利用現有運動場地創作，用咗特殊材料塗鴉設計，加上燈光裝飾，喺度打匹克球應該寧舍夢幻。
新口岸區「鎏光・派對」
地點：澳門大賽車博物館一帶（高美士街、廈門街、長崎街）、澳門大賽車博物館
新口岸區共有9個作品，當中焦點作品一定係澳門大賽車博物館嘅3D光雕表演「奇幻旅程・澳門故事」，由澳門本地設計團隊創作，運用3D投影技術，將可愛嘅吉祥物麥麥立體呈現大家眼前，每15分鐘一節，每節片長6分鐘，帶領大家走過澳門跨越時空嘅文化演變旅程。
喺活動期間的星期五、六、日及特定節慶日子，澳門大賽車博物館附近嘅高美士街、廈門街同長崎街一帶更會有美食、文創和遊戲攤位等，十足特色主題嘉年華！
快閃 + 延伸活動 打卡集星贏禮物
而喺光影節期間，每晚更會上演不同嘅驚喜快閃活動，內容涵蓋魔術、舞蹈、機械人表演、音樂或武術表演等，想睇特定項目記得去網頁睇詳情！另外更會喺場地舉行延伸活動工作坊，如手繪葡國花磚工作坊、夜光匹克球交流活動、AI機械人交流、醇香咖啡館咖啡品鑒，以及咖啡渣再利用轉運活動等，好玩又環保；至於機不離手嘅你，一定要玩埋多個線上活動，除咗考反應嘅「麥麥摘星大作戰」，仲有實地互動拍攝AR體驗，同埋喺裝置掃二維碼收集星星嘅「集星遊戲」，隨時贏走獨家禮品！為方便大家遊覽，光影節仲特別準備兩條免費「光影巴士巡遊」路線「引流線」同「巡迴線」，前者從中區國際銀行出發，直達新口岸區核心地帶，後者就會穿梭於三大展區之間，記得check定時間表喇。
2025澳門國際光影節
日期：即日至2026年1月11日
地點：南灣區、北區、新口岸區
時間：6pm-10pm
網址：https://lum.macaotourism.gov.mo/
②戶外聖誕主題街區 | 繽紛聖誕新口岸
澳門大賽車博物館一帶除咗會喺光影節期間逢星期五至日及節慶日子有攤位，喺一街之隔嘅廣州街至北京街一帶，都會舉行「繽紛聖誕新口岸」延伸活動，有6組大型主題聖誕燈飾、打卡裝置，由聖誕樹到夢幻飄雪都有，到星期六日及節慶假日，仲有加碼上演互動體驗，包括巡遊表演、聖誕老人見面會、遊戲攤位同工作坊等，十足十戶外聖誕主題街區！
繽紛聖誕新口岸
日期：即日至2026年1月11日
地點：澳門新口岸廣州街及北京街一帶
時間：4pm-10pm
特別活動日期：2025年12月20-28日、2026年1月3-4日、10-11日
網址：https://wk.wkebcc.com/index/Christmas/index2
③老街互動燈光秀 | 幻彩夜關前
關前街區一向是澳門必到嘅文創特色老街，整條街都是打卡位，是真正的由街頭影到街尾！五顏六色嘅小街由12月開始，會在夜晚來個亮燈大變身，以星星為主題，上演「幻彩夜關前• 星光互動場」光雕投影，設有光影互動門、光影瀑布、螢光奇境3大場景；當中仲有沉浸式互動裝置，到時星光會跟住你嘅動作流轉，無論拍片影相都咁靚！現場仲有工作坊及市集等，一次過滿足shopping+打卡願望，記得plan好時間由日頭玩到夜晚！
幻彩夜關前・星光互動場
地點：澳門關前街區一帶(關前正街、關前後街、果欄街及俊秀里）
日期：即日起至2026年3月5日
時間：6pm-10pm；夜關前光影市集 1pm-10pm、光影工作坊 4pm-5pm
網址：https://www.macaotourism.gov.mo/zh-hant/events/whatson/12595/
④食買攤位+親子遊戲 | 北區冬日市集
相比澳門大馬路和新口岸等旺區，香港遊客較少去澳門北區玩，其實北區生活氣息濃厚，更有大量小店美食！對北區有興趣嘅，一定唔好錯過喺青洲坊蓮花廣場舉行嘅「北區冬日市集」，除咗多個美食市集攤位如漢堡包、雞蛋仔、曲奇甜點和特調飲品等，另有售賣文創、手信、及寵物用品的攤位，更可以挑戰聖誕層層叠、雪球大作戰同薑餅人之家等game，仲會有「聖誕互動節目」、「冬日心願樹」、「飄雪互動區」等打卡位同親子活動等緊你！
北區冬日市集
日期：2025年12月20-28日
地點：澳門青洲坊蓮花廣場
時間：5pm-10pm
網址：playfunmacau.com
Source：澳門特別行政區政府旅遊局
UTravel熱門旅遊話題
↓立即登記參加！賺取無上限現金賞💰↓
附搶飛連結🔗不再錯過演出消息‼️
