獨家｜前TVB男星北上半夜試戲惹擔憂被網友以為賣去KK園區？本尊現身說法

2025.01.21

前TVB男星譚坤倫（Alan）曾在《愛．回家之開心速遞》中飾演IT部的「CPU」一角而彈起，去年4月突然離巢效力13年的TVB，更主力北上內地發展及拍戲。而近日他在凌晨時分在IG透露有導演找他試戲，更惹來網民擔心他受騙，被賣去KK詐騙園區！

被以為賣去KK園區？

譚坤倫現身在內地，日前在凌晨更新IG Story，留言：「呢個鐘數突然間被人叫去見導演試戲！00：48」。從譚坤倫po出的照片可見，他疑似在車廂中拍攝天黑的路面情況，夜深人靜，街上車子不多。由於早前內地男演員王星因拍戲而被騙去KK園，令網友擔心他同樣中招，被人「賣豬仔」。

點擊圖片放大

不過在9小時後，譚坤倫在IG報平安，他在山上貼出一張天亮的照片：「早晨，多謝大家關心，成日驚我畀人潛規則，或者呃去KK園，人哋搵我咁急，係因為劇本出咗啲新角色，需要識得打嘅人，而佢哋嘅開機時間比較急，導演接近冇乜時間去見人。」

之後譚坤倫又分享另一個IG Story，相中見從電梯門半打開，電梯門外有一張「歡迎光臨」地毯，他留言指劇集的男主角受歡迎：「我哋男主角真係爆紅咗，樓下勁多粉絲，我係冇位行入嚟，今日係超級誇張！」

本尊現身說法

譚坤倫接受本網訪問，指該IG Story引起一場誤會，不少朋友及網友馬上聯絡他：「可能大部份人都知道我一個人上嚟內地，會比較擔心，加上內地假劇組請演員去泰國嘅事件，通常朋友擔心，或者網民擔心，都會留言或者DM我，叫我小心唔好俾人呃去KK園。」他亦表示：「不過今次亦都非常多謝大家關心，令到我感覺雖然我一個人在內地，但依然有好多朋友同傳媒關心，十分感恩！」

他解釋事件的始末，原來是導演及劇組需要急找演員：「因為個劇本不斷更改緊，所以有啲人物角色係新嘅，或者根據佢哋揀咗嘅人嘅特長去更改劇本，所以好多嘢變緊，同時間又要武術訓練，騎馬訓練，然後佢哋又要去睇景，但係開機時間定落咗喺初九，所以好急，因為劇本會影響到所有人，以及所有景，所以先咁夜都仲搵我試戲嘅情況，嗰日晚上一到達就普通傾偈先，然後再試做一場戲，然後導演再憑佢嘅感覺去尋找一個適合我嘅角色，然後就安排我武術訓練。」

譚坤倫今年4月突然宣布離巢，與TVB結束13年賓主關係，北上發展拍劇。圖片來源：IG@alantklun

點擊圖片放大

譚坤倫指試戲幾點都有可能發生，「因為橫店呢一個地方，係好細同埋好集中，全部地方10分鐘就可以到達，所以幾點都有機會有人叫我出去，加上今次見導演係導演的朋友介紹，所以變相其實係好似介紹朋友嘅感覺去見面，所以先會有咁夜嘅情況。正常喺香港就一定唔會咁夜，亦都好難隨傳隨到。」

現在定居橫店

現在定居內地多月，譚坤倫指現正不斷找尋新的拍劇機會：「啱啱開頭走上嚟，了解到呢邊嘅狀況會覺得好困難，競爭力好大，認識嘅人唔多，只能靠自己在網上不斷遞交資料，希望盡咗自己能力去嘗試。」他又指現在定居在橫店，「而家轉咗住月租有廚房，咁就通常自己煮嘢食，健康之餘又可以保持身材。因為呢度其實係一個小鎮，所以租金都比較平，然後橫掂呢個地方基本上係10分鐘嘅生活圈，所以認識人嘅速度會好快，亦都有好多好好嘅人去介紹好多唔同嘅人俾我認識，所以現在已經開始好多朋友，心理上亦都舒服好多。」