上星期港航推出「一click即享」震撼優惠，搞到航空界滿城風雨，本週又爆搶購潮，加入戰團嘅唔係航空公司，而係機票網ZUJI，趁住十周年，連續兩星期(25/2~8/3)推出$10機票，仲考考大家尋寶能力！為咗幫各位齊齊買到飛，UTips喺度畀啲必勝貼士大家！

ZUJI每日放出唔同目的地嘅機票，每日分開4個唔同時段放出$10飛（未計稅）。4個時段基本上係Random出現，每次得20分鐘，仲要數量極之有限要同其他人鬥快！

建議大家先like 「Zuji Hong Kong」個facebook專頁，佢會喺時段開始前少少時間，開post提醒大家時段分佈，所以大家不妨like左個專頁同set埋"Get Notifications"，就唔會錯過關鍵時刻！

留意！每次公佈嘅時段係某半小時內嘅20分鐘，例如「09:05~09:35」內20分鐘，即係未必09:05即刻見到$10機票，但要keep住search囉！

另外，4個時段都係賣指定航空公司（包括中國國際航空、中華航空、中國東方航空、香港航空）嘅機票，出發日子無得揀，而且每個時段賣嘅出發日子都唔同，Zuji會提示大家係邊個月份，但未必講明邊一日！所以大家search機票時，出發日子應該揀該月份嘅平日（星期一至四）！

大家亦可以用「FlightSaver Date Search (+/- 3 days)」，佢會畀個有晒最抵價錢嘅日曆你，方便好多。不過，小記星期三試買$10法蘭克福機票，發現用「+/- 3 days」個日曆show唔到價錢喇，即係話呢個功能有機會畀ZUJI禁用左，如果真係用唔到，唯有開多幾個Browser估日期，記住估平日呀！

再提提大家，由於機票數量極之有限，事前請準備好你同旅伴嘅護照資料（姓名及出生日期）同信用卡資料，資料Copy & Paste或者留低Cookie畀電腦幫你記低，一定快過打字，唔好等到時慢慢輸入，以防最後付款失敗啊！

大家記住上ZUJI熟習咗個system，練咗先好買呀！祝你哋好運！

U Tips 提提你︰

1. Like「ZUJI Hong Kong」facebook專頁，按Get Notifications
2. 根據專頁開售前提示，重點搜尋平日出發之機票
3. 準備好旅客資料(護照上姓名、出生日期)
4. $10機票並未計稅項及燃油費