日本旅遊攻略
現時信用卡優惠愈來愈多，網購及無現金付款都將會係未來嘅大趨勢，似乎申請返張信用卡傍下身都唔錯啵！成日都聽到邊間銀行新推信用卡好多優惠，又聽到有啲儲Asia Miles好抵，咁多選擇都唔知揀邊張好！今次就同大家分析下坊間申請信用卡嘅時候經常攞嚟比較嘅兩樣：現金回贈 vs. 飛行里數，究竟邊張信用卡碌得抵啲，迎新優惠又吸引呢？唔使逐間銀行睇，即睇以下比較啦！
延伸閱讀：旅遊攝影7大性價比高相機推介！ 攝影新手／專業攝影師／戶外運動愛好者總有一款適合你！
現金回贈 vs. 飛行里數
發卡行為咗吸引更多顧客使用佢哋嘅服務，都會推出唔同種類信用卡，分不同優惠同年薪要求，再加埋迎新優惠吸取最多顧客。而講得最多嘅，都係現金回贈同飛行里數呢兩樣。現金回贈就係指碌夠一個數就會回贈某一個百分比嘅現金畀你，變相用少左錢買嘢。某啲發卡行都會以積分計算，可以用嚟換禮品。
飛行里數就當然適合鐘意成日飛嚟飛去嘅朋友啦，碌得愈多就賺得愈多，有啲仲可以碌部手機賺一程機票錢。一般大家都係儲Asia Miles或者Avios里數，有啲信用卡只可以儲其中一邊，有啲就可以用消費累積積分兩邊換晒，仲要留意積分有冇過期等⋯⋯最緊要大家記得一定要因應自己財政狀況消費，唔好因為優惠吸引就搞到自己負債累累呀！
講完咁多，想申請信用卡嘅初哥大致明白兩樣分別同自己想用邊一款信用卡。呢個時候戲肉嚟喇，邊一款信用卡碌得抵啲、迎新多啲呢？
3張主打現金回贈信用卡推介
1. 渣打銀行 Simply Cash Visa卡
呢張卡一推出嘅時候吸引好多新客申請，因為當時佢迎新係有100%現金回贈，即係碌$1,000送$1,000，的確好抵！雖然而家迎新冇咁抵，不過都有25%現金回贈，而且本地簽賬嘅現金回贈率都係咁多張卡入面數一數二高嘅！仲要年薪要求超低，就算係初出茅蘆嘅打工仔都申請到！
年薪要求：HKD$96,000
年費：首年免費，其後每年HKD$2,000（梗係可以打去豁免！）
現金回贈比率：本地簽賬 1.5%、海外簽賬 2%（無上限回贈！）
- 本地簽賬包括所有港幣現金及網上購物簽賬、食肆簽賬、PayMe儲值、八達通自動增值
- 海外簽賬包括外幣現金及網上購物
迎新優惠：總共高達HKD$1,100（首2個月）
- 合資格簽賬*達HKD$4,000後可獲25%現金回贈，即高達HKD$1,000
- 獲發新卡後新登記網上理財並登入可獲額外HKD$100
*合資格簽賬為零售購物簽賬（包括本地及海外）、網上消費或已誌賬之分期付款金額。(迎新PayMe、八達通自動回贈、網上繳費都唔計架！）
2. 花旗銀行 Citi Cash Back信用卡
年薪比較高嘅朋友，不妨考慮Citi Cash Back，因為呢張卡無論本地或者海外簽賬都有2%回贈，仲要係無上限！Cash Back而家做緊嘅迎新就有3款畀你揀，簽滿額就有架喇。留意返呢張卡審批比較手緊，爭少少年薪嘅朋友都未必申請到！
年薪要求：HKD$240,000
年費：首年免費，其後每年HKD$1,800（梗係可以打去豁免！）
現金回贈比率：本地簽賬 2%、海外簽賬 2%（無上限回贈！）
- 本地簽賬包括食肆及酒店簽賬。（PayMe儲值、八達通自動增值、網上購物及其他港幣簽賬只得1%回贈）
- 海外簽賬包括外幣現金及網上購物
迎新優惠：合資格簽賬*滿HKD$10,000可選以下三揀一迎新賞（首2個月）
- 香港文華東方酒店雙人下午茶，或
- HKD$800惠康現金券，或
- HKD$700崇光百貨禮券
*合資格簽賬為零售購物簽賬（包括本地及海外）、網上消費或已誌賬之分期付款金額。
*PayMe迎新都計架，過一過數即刻有錢送！
3. 安信 EarnMORE 銀聯信用卡
呢張卡最吸引嘅地方係全日制學生都可以申請到，另外年薪較低人士都可以申請。此外回贈率都高，迎新選擇都唔錯！不過呢張係銀聯，唔係Master或者Visa，相對適合中港消費較多嘅朋友。
年薪要求：全日制學生／HKD$150,000
年費：首兩年免費，其後每年HKD$800（梗係可以打去豁免！），大專／大學生更加頭五年豁免年費！
現金回贈比率：本地簽賬 2%、海外簽賬 2%（無上限回贈！）
- 本地簽賬包括所有港幣及網上購物簽賬、八達通自動增值（PayMe唔計！）
- 海外簽賬包括外幣現金及網上購物
迎新優惠：合資格簽賬*高達HKD$770現金回贈或其他迎新優惠（首90日）
- 簽賬滿HK$8,500，可獲迎新HKD$500現金回贈，及
- 簽賬額2%現金回贈，即HKD$170，及- 網上成功申請，可獲HK$100現金回贈，總共HKD$770
- 大專生可另外可享簽$2,000獲$200現金回贈
*合資格簽賬為除PayMe、現金透支及信用卡費用外所有簽賬消費（八達通自動增值都計迎新！）
或
- OTO 頸膊鬆 (總值HKD$4,200)，或
- Panasonic 空氣清新機 (總值HKD$1,280)，或
- 高達HK$90,000免息免手續費現金分期套現計劃
5張主打儲飛行里數信用卡推介
1. 渣打銀行 Asia Miles Mastercard 信用卡
講到最易申請又性價比最高嘅一定係呢張渣打Asia Miles，不但年薪要求低、里數每月自動入落戶口唔洗煩，食肆、網上同海外簽賬可以做到$4兌1里，而且迎新係超級抵！2個月內簽夠$7,500，18,000里就已經袋咗落袋，加埋本身簽賬嘅兌換，換到來回日本機票簡直不是夢！
年薪要求：HKD$96,000
年費：首年免費，其後每年HKD$2,000（梗係可以打去豁免！）
可換里數種類：Asia Miles
里數兌換比率：
本地食肆、網上購物、海外簽賬 HKD$4/1里
PayMe、八達通自動增值、其他簽賬 HKD$6/1里
迎新優惠：總共可換高達40,000 Asia Miles里數（首2個月）
- 合資格簽賬*達首HKD$1,000，兌換率為HKD$0.2/1里（最高可換5,000里數）
- 其後HKD$6,500，兌換率為HKD$0.5/1里（最高可換13,000里數）
- 其後HKD$88,000，兌換率為HKD$2/1里（最高可換22,000里數），合共40,000里
- 新卡發出後於迎新期內新登記網上理財可獲額外HKD$100現金點贈
*合資格簽賬為零售購物簽賬（包括本地及海外）、網上消費或已誌賬之分期付款金額。(迎新PayMe、八達通自動回贈、網上繳費都唔計架！）
里數存入：每月結算後自動兌換里數存入Asia Miles戶口，無須收費
2. 星展銀行 Black World Mastercard 信用卡
星展銀行嘅Black World Mastercard就得海外做到$4兌1里，而且迎新只係頭$2,000抵啲。不過勝在可以兌換Asia Miles以外嘅里數（有關每間兌換里數嘅比較會喺第二篇文章再詳細分析！），彈性高啲。另外年薪要求雖然睇落稍高，不過星展其實批得算手鬆，試過唔夠都會批！
年薪要求：HKD$240,000
年費：首年免費，其後每年HKD$2,000（梗係可以打去豁免！）
可換里數種類：Asia Miles、Avios、KrisFlyer、鳳凰知音
里數兌換比率：
本地及網上購物、PayMe簽帳：HKD$6/1里
海外簽賬：HKD$4/1里
八達通自動增值只得HKD$12/1里！
迎新優惠：成功申請後弓簽賬並登記及啟動DBS Omni帳戶，總共可換高達50,000里數及額外優惠（首2個月）
- 本地合資格簽賬*達首HKD$2,000，兌換率為HKD$0.5/1里（最高可換4,000里數）
- 其後HKD$100,000，兌換率為HKD$4/1里（最高可換25,000里數）
- 海外合資格簽賬首HKD$63,000，兌換率為HKD$3/1里（最高可換21,000里數），合共50,000里
- 新客戶經DBS Omni成功申請，可享額外HK$200「一扣即享」迎新金額
*合資格簽賬為零售（包括食肆）購物簽賬（包括本地及海外）、網上消費或已誌賬之分期付款金額。本地交易澳門幣亦計算在內（迎新PayMe、八達通自動回贈、網上繳費都唔計架！）
里數存入：每月結算後存入DBS$戶口，轉換里數無須收費，積分亦無有效期。兌換Asia Miles立即入賬，其他約需3-8工作天存入
3. American Express CX Elite 信用卡
AE最吸引嘅當然係可以入Lounge。不過入Lounge次數就由今年4月1日起改咗，由無限次減到得返10次，不過都夠晒用啦，另外頭3個月迎新兌換里數比率都吸引，海外簽賬做到$3兌1里，成功申請仲率先送你1,000里，都多優惠架。
年薪要求：HKD$300,000
年費：首年免費，其後每年HKD$1,800（可以打去豁免！）
可換里數種類：Asia Miles
里數兌換比率：
本地及網上購物、自動轉帳（水電煤外）：HKD$6/1里
海外簽賬：HKD$4/1里
Payme、八達通增值冇得儲里數！
迎新優惠：享用優惠里數兌換比率及總共可換高達7,000 Asia Miles里數及（首3個月）
- 優惠里數兌換比率本地簽賬 HKD$5/1里（上限換40,000里，即簽HKD$200,000）
- 海外簽賬則為HKD$3/1里（上限換30,000里，即簽HKD$90,000）
- 網上成功申請即送1,000里
- 合資格簽賬*首HKD$5,000，兌換率為HKD$1/1里（最高可換5,000里數）
- 首HKD$5,000包括優惠里數兌換比率，可賺額外1,000里，總共7,000里
*合資格簽賬為本地及外幣消費（網上購物亦包括在內）及自動轉賬（水電煤唔包）
其他優惠：
- 每年可享用環亞機場貴賓室（Plaza Premium Lounge）共10次
- 自動成為馬可孛羅會綠卡會籍會員，費用豁免
里數存入：每月結算後自動存入Asia Miles戶口，轉換里數無須收費。
4. 東亞銀行 Flyer World Mastercard 信用卡
原本呢張卡嘅迎新優惠算吸引，不過而家已經冇咗迎新優惠，剩低嘅賣點就係大部分類型消費都係$5/1里，平均計返都算平。再講落去嘅賣點可能就係戲飛8折，不過就同里數無關啦。
年薪要求：HKD$240,000
年費：首年免費，其後每年HKD$1,800（可以打去豁免，如果有東亞戶口可以永久免年費）
可換里數種類：Asia Miles
里數兌換比率：
本地及海外簽賬：HKD$5/1里
超市簽賬、旅行社、自動轉賬、八達通自動增值：HKD$8/1里
迎新優惠：無
其他優惠：
- MCL 院線(MCL長沙灣戲院除外)正價戲票8折及Festival Grand Cinema售票處優先購票專櫃 - 香港UA 院線正價戲票8 折 及指定UA院線戲院售票處優先購票專櫃
里數存入：簽帳額轉換成BEA積分*存入Asia Miles戶口，約需7-14個工作天。積分有效期為五年，轉換里數無須收費
5. 花旗銀行 Citi Rewards Card Mastercard 信用卡
千祈唔好睇少呢張信用卡，因為呢張卡最抵可以做到HKD$1.88/1里，唔計迎新真係全城最抵！不過唔好嘅地方因為呢張唔係飛行里數卡，積分兌里數係要換錢嘅，所以用呢張卡嘅朋友最好儲埋一次過換喇！
年薪要求：HKD$150,000
年費：首年免費，其後每年HKD$1,800（梗係可以打去豁免！）
可換里數種類：Asia Miles、Avios
里數兌換比率：
本地、網上購物、自動轉帳、PayMe及八達通自動增值：HKD$15/1里（咪住先！如果係經常去超市買嘢嘅人用呢張卡簽賬其實好抵！）
超市、百貨、電訊簽賬：HKD$3/1里（5X積分）
生日月更享以上三類簽賬8X積分：HKD$1.88/1里！
迎新優惠：合資格簽賬*滿HKD$10,000可選以下三揀一迎新賞（首2個月）
- 香港文華東方酒店雙人下午茶，或
- HKD$800惠康現金券，或
- HKD$700崇光百貨禮券
*合資格簽賬為零售購物簽賬（包括本地及海外）、網上消費或已誌賬之分期付款金額。
*PayMe迎新都計架，過一過數即刻有錢送！
里數存入：每月簽賬轉換成積分存入戶口，積分永久有效。轉換Asis Miles/Avios里數約需4個工作天，每5,000里收費HKD$50、上限HKD$300
滙豐 Red Mastercard/ Visa信用卡比較
Red Mastercard
Red Mastercard特點係網購有成4%回贈，獎賞錢換做兌里數都好抵。加上無上限現金回贈同埋申請門檻較低，呢張新出嘅Mastercard的確係幾吸引！
年薪要求：HKD$120,000
年費：永久豁免年費
可換里數種類：Asia Miles
獎賞錢回贈比率：網購簽賬（本地或海外）4%、本地超市簽賬 2%、其他本地及海外簽賬 1%、八達通自動增值及ebanking網上繳費 0.4%（PayMe冇回贈！）
里數兌換比率：網購簽賬（本地或海外）HKD$2.5/1里、本地超市簽賬 HKD$10/1里、其他本地及海外簽賬HKD$10/1里、八達通自動增值及ebanking網上繳費 HKD$25/1里（PayMe冇回贈！）
迎新優惠：首60日合資格簽賬*累積簽賬達 HKD$8,000，全新客戶最高可獲HKD$800獎賞錢、現有客戶最高可獲HKD$300獎賞錢
Visa Signature/Platinum Card
Visa Signature/Platinum Card有滙豐嘅最紅自主獎賞，食正佢優惠可以用超抵比率兌里數！不過Visa Signature門檻比較高，如果年薪或者資產唔夠都可以申請Platinum Card，優惠都抵。
年薪要求：HKD$360,000或有HKD$400,000資產（Visa Signature）、HKD$150,000（Platinum Card）
年費：頭兩年免年費，其後每年年費HKD$2,000（Visa Signature）、HKD$1,800（Visa Platinum）
可換里數種類：Asia Miles
里數最低兌換比率（最紅自主獎賞*5X）：
Visa Signature Card
網購簽賬（本地）HKD$1.79/1里、其他本地簽賬 HKD$2.78/1里、海外簽賬HKD$1.79/1里、網上繳費 HKD$25/1里（PayMe同樣冇回贈！）
Visa Platinum Card
網購簽賬（本地）HKD$2.27/1里、其他本地簽賬 HKD$4.17/1里、海外簽賬HKD$2.27/1里、網上繳費 HKD$25/1里（PayMe同樣冇回贈！）
迎新優惠：首60日合資格簽賬*累積簽賬達 HKD$8,000，全新客戶最高可獲HKD$900獎賞錢、現有客戶最高可獲HKD$300獎賞錢，另外可額外獲享HKD$100獎賞錢賞付款獎賞，只要：
- 未曾於 2019 年 9 月 1 日至 2020 年 3 月 3 日期間登入滙豐 Reward+應用程式
- 經滙豐 Reward+應用程式內的「賞付款」功能，成功以「獎賞錢」繳付合資格信用卡的信用卡結單或其合資格交易
合共HKD$1,000迎新獎賞
滙豐獎賞錢
滙豐碌卡儲到嘅積分係用獎賞錢計算，一般計法碌HKD$250就有1蚊獎賞錢，1蚊獎賞錢就可換10飛行里數。不過滙豐Visa有最紅自主獎賞，即係可以最多獲得額外5倍嘅獎賞錢。大家可以喺滋味、玩樂、世界、品味、中華、家居6個種類分配，如果想張卡碌食肆多，又中佢就可以擺晒5倍(5X)喺滋味類別，咁就可以碌卡果陣獲得額外5倍(5X)獎賞，例如：
如果用Visa Signature卡食肆簽帳HKD$3,000，
- HKD$3,000 = 12元獎賞錢
- 5X賞滋味最紅自主獎賞 =12x5 = 60元獎賞錢
- 總共賺：12 + 60 = 72元獎賞錢（可兌720 Asia Miles飛行里數）
- 變相3000/720 = HKD$4.17/1里
如果用Red Mastercard網購簽賬HKD$3,000，
- HKD$3,000 x 4%獎賞錢回贈 = 120元獎賞錢
- 120元獎賞錢可兌1200 Asia Miles飛行里數
- 變相3000/1200 = HKD$2.5/1里
所以如果識玩嘅話真係可以極速儲里數，而且可以不時享有滙豐推出嘅獨有優惠！而家仲要獎賞錢兌換里數唔使收一次性$300手續費，用Apple Pay/Samsung Pay/Google Pay仲可以有額外回贈，真係好抵！
呢篇懶人包同大家比較現金回贈 vs. 飛行里數信用卡嘅選擇。相信大家睇完都會清楚想要邊一款信用卡。咁就事不宜遲去申請，如果唔係迎新可能隨時就冇！記得大家按自己經濟能力碌卡，唔好爭落周身卡數，搞到自己負債累累呀！
UTravel熱門旅遊話題
↓主題追蹤人次突破二百萬!! 即刻重溫精彩時刻 ↓
立即探索🔍最新熱門活動📍好去處推介🌟
