日本旅遊攻略
2020年嘅農曆新年即將來臨，大家啱啱過完聖誕節好快又可以享受一連4日嘅新年假期。鍾意旅遊嘅你，除咗去親友屋企拜吓年同享受各式各樣嘅賀年食品外，就梗係要把握呢個黃金機會去外地度吓假，放鬆吓啦～
不過大家計劃行程嗰陣，除咗要安排精彩嘅活動同埋優質嘅食宿之外，其實有樣嘢都好重要，就係要確保自己嘅旅程受到全面保障，咁先可以玩得開心又放心！
而其中一樣可以保障到大家外遊旅程嘅，就係旅遊業賠償基金（「賠償基金」）。計劃離港外遊嘅你，記住留意以下5個賠償基金注意事項！
（一）了解賠償基金所提供嘅保障
簡單嚟講，外遊旅客如果損失咗外遊費，賠償基金可以為受影響旅客提供所損失外遊費90%嘅特惠賠償，呢個情況一般發生喺持牌旅行社倒閉嘅情況下。如果萬一唔好彩，外遊旅客喺持牌旅行社提供或舉辦嘅外遊活動中意外傷亡，係可以得到總數高達HK$300,000嘅特惠賠償以報銷當地醫療、殮葬/遺體（包括骨灰）運返香港以及親屬因旅客傷亡而往訪當地所招致嘅實際開支。
（二）知道點為之係「外遊旅客」
話明賠償基金係保障「外遊旅客」，咁點為之係「外遊旅客」呢？根據《旅行代理商條例》（第218章），「外遊旅客」係指已經向持牌旅行社付款購買下列全部或任何兩項服務嘅人，包括：
1）喺香港出發去內地或海外嘅交通；
2）喺香港境外任何地方嘅住宿；
3）由持牌旅行社舉辦或安排喺香港境外任何地方嘅活動（該活動並非附屬於第1）或第2）節嘅服務）。
所以大家要買咗上述其中兩項或以上嘅服務先係法例上屬於「外遊旅客」，可以得到賠償基金嘅保障。
而根據呢個定義，旅客如果向持牌旅行社購買以下4類之中任何一類嘅旅遊服務，相關交易係唔屬於賠償基金嘅保障範圍：
- 單獨購買機票、船票、巴士票；
- 單獨購買酒店住宿；
- 喺香港境外地方集合並解散嘅一天團；
- 購買冇明確指定可以兌換上段所提及任何兩種或以上旅遊服務嘅旅遊現金劵或優惠券。
（三）知道「外遊費」一般包括咩收費項目
一般而言，外遊費所包括嘅收費項目總係關乎（a）離港交通；（b）香港境外住宿；（c）香港境外活動（並且同（a）、（b）無關係）之中嘅任何兩項。大家可以參考以下常見外遊收費項目嘅例子：
離港交通：常見例子有機票/郵輪船票、座位升級附加費、飛機乘客離境稅、簽證申請費、客運燃料附加費、旅遊保險、機場保安稅和機場建設費等。
香港境外住宿：常見例子有住宿/房間費、單人房附加費、房間升級附加費、額外加床費用、額外早餐費用和郵輪上相類項目嘅費用等。
香港境外活動：常見例子有主題公園和景點入場費，以及城市遊覽嘅費用等。
（四）記住揀持牌嘅旅行社
購買外遊服務嗰陣，無論你上網買，定係去實體店買，記得一定要向持牌旅行社購買先可以得到賠償基金嘅保障。旅行社嘅牌照號碼係有六位數字，牌照號碼字頭會係“35”或“24”。如果大家唔清楚想幫襯嘅旅行社有冇持有有效牌照，可以瀏覽政府旅行代理商註冊處網頁查詢（網址：www.tar.gov.hk）。
（五）確保取得印花收據
如果大家買多過一項外遊服務（即係第（二）點所講嘅三項服務中嘅兩項或以上）， 就記得攞到付款收據後，一定要睇清楚收據上有冇蓋上電子印花（註：由2019年7月1日起，傳統印花蓋印機已停用，而徵費印花已全面由電子印花徵費系統發出）。
電子印花都有兩樣嘢要留意。首先，大家要留意番電子印花上面有冇清晰顯示徵收嘅金額同日期。記住，印花徵費嘅金額應該係相等於已付外遊費全數嘅0.15%。例如，如果你俾咗旅行社HK$12,000購買香港至札幌機票連當地酒店住宿套票，你張付款收據上嘅電子印花就應該顯示已繳交HK$18 嘅印花徵費。
仲有，大家要留意收據同電子印花上所顯示嘅旅行社名稱同牌照號碼，係咪同大家幫襯嘅旅行社一樣。
如果大家想查核收據上嘅電子印花係咪有效，除咗可以透過電子印花徵費系統嘅網頁（www.elevy-ticf.org.hk），亦都可以用智能電話或平板電腦掃描電子印花上面嘅二維碼（QR Code）。
因為持有蓋上印花收據嘅外遊旅客，先會受到賠償基金嘅保障。如果發現有唔妥，記得提幫襯嘅旅行社糾正返呀。如果想查詢或投訴有關印花徵費嘅事宜，可以致電香港旅遊業議會（電話：2969 8188）。
了解完賠償基金5個注意事項，出發前亦要記得買番份適合自己嘅旅遊保險，雙重保障先係最醒！
想知更多關於旅遊業賠償基金嘅詳情，可以瀏覽www.ticf.org.hk。
資料來源：旅遊業賠償基金管理委員會
UTravel熱門旅遊話題
＞登記即送，人人有賞！＜
立即探索🔍最新熱門活動📍好去處推介🌟
