日本旅遊攻略
去開澳門玩嘅朋友都知，keep住有新景點落成，作為亞洲娛樂總滙嘅「新濠影滙」，步伐當然都唔可以停落來，集合多個娛樂地標比大家玩番夠本！當中包括新開幕「傳奇英雄科技城」第二期、澳門首個彈床主題樂園Flip Out、地標建築「影滙之星」等等，即刻睇落去同你逐樣介紹！
刺激興奮嘅「傳奇英雄科技城」！
作為全澳最大嘅VR主題樂園「傳奇英雄科技城」結合頂尖虛擬技術，有齊VR、AR、全息圖、4D超立體巨幕等高科技玩樂體驗！最近喺第二期內新增咗四個全新體驗區域，超過50款遊戲等緊你！
四個全新體驗區域分別係Prime (皇牌呈獻)，喺果到你可以感受到世界頂尖科技，令你五大感官擁有前所未有嘅體驗，包括職業賽車、超動感4D+影院都係必玩之選。第二個係Arena(VR競技場)，講到科技娛樂，又點可以冇虛擬實境呢， VR碰碰車、職業賽車等刺激又好玩嘅遊戲，令你感受超越想像嘅興奮。虛擬世界玩夠，可以轉變到DPLAY區域，包括各類型運動娛樂、 懷舊街機同搖滾樂主題嘅保齡球賽道。玩到攰想休息一下？就可以去Style坐低抖抖，果到提供咖啡同各類型餐飲小食，當中更有來自意大利嘅世界頂級咖啡品牌-Pascucci。而喺紀念品區中，有來自世界各地嘅優質產品，買樣返去記低喺呢到好好玩樂嘅回憶啦～
票價：每位澳門幣260（包括2,000遊戲點數）
*每個遊戲所需遊戲點數不同，從200點到1,200點都有。
*持有手帶的客人能於當日多次進出樂園。
*客人使用完手帶的點數後，可在園內增值，繼續遊戲。
位置：新濠影滙時代廣場一樓及東翼二樓
放電好玩嘅彈床主題樂園Flip Out！
Flip Out係澳門首間大型室內彈床主題樂園，就算平日冇咩運動，都一樣好玩，甚至可以做出平時做唔到嘅動作！跳彈區有海綿墊保護，而且樂園入面分咗幼兒區，彈跳區同進階特技區，大人細路可以揀番啱自己嘅程度玩～
票價：小童(未滿18歲) $150 (一小時)，成人$200 (一小時)
陪同入場 (不使用彈床設施)：$50
位置：新濠影滙西翼二樓
最佳打卡位「影滙之星」！
坐上全球最高「8」字形摩天輪，咁高望落去澳門美景一覽無遺，絕對係震撼嘅打卡位！同另一半享受呢個美景，真係好浪漫～「影滙之星」高懸130米，聳立喺新濠影滙兩棟充滿藝術風格嘅酒店大樓之間，立即成為澳門新地標！當中有17個復古科幻為主題嘅觀景廂，每個包廂可容納多達10人，一家大細去坐都冇問題！
票價：成人 $100 (澳門居民$85)，2歲以下嬰幼兒免費入場
*12歲以下小童必須由18歲或以上成人陪同
位置：新濠影滙東翼三樓
必到「新濠動漫魂」
新濠影滙最近仲破天荒化身成動漫聖殿，推出以「新濠動漫魂」為主題嘅一系列期間限定互動體驗等你來玩，將你童年嘅動漫魂呼喚出來啦！
必玩免費嘅神聖軍團大挑戰，由你控制動漫機械戰士戰勝邪魔～仲有「藝文薈澳－Art Macau國際藝術大展」矚目活動，「漫遊—從浮世繪到動畫」展覽，欣賞融合動漫同漫畫嘅獨特藝術作品，更有多款懷舊嘅街機遊戲俾你免費任玩，一定令你大開眼界！
神聖軍團遊戲大挑戰
位置︰東北入口處大螢幕
高質嘅日式鐵板燒及拉麵！
玩到餓果陣都唔使怕，喺新濠影滙都有各式餐廳畀大家醫肚。其中日本餐廳Hide Yamamoto更提供香氣滿溢嘅日式鐵板燒，提供多款高質即燒美食，全部肉汁豐富，一試難忘！牛味濃郁嘅日本和牛腰肉排表層香口，中間就入口即融，完全唔覺油膩！仲有鐵板燒新鮮空運龍蝦，鮮甜爽口，肉質彈牙！壽司吧有從日本豐洲漁市場空運嘅最新鮮魚穫～
旁邊新開嘅山本日式拉麵Hidemasa，可以細嘗廚師傳承110年傳統手藝打造嘅自製拉麵。湯底有雞湯、橫濱油豚骨醬油、東京醬油同北海道味噌湯底多款選擇，仲有自選配菜、天婦羅及壽司卷等日本美食，讓大家品嘗頂級和風滋味！
Hide Yamamoto & 山本日式拉麵Hidemasa
位置︰新濠影滙購物大道一樓1091號
*資料由客戶提供
UTravel熱門旅遊話題
＞登記即送，人人有賞！＜
附搶飛連結🔗不再錯過演出消息‼️
