日本旅遊攻略
要賞花兼打卡，唔使搭飛機嘅，近近哋嘅澳門就有花睇！澳門貴為「蓮花寶地」，每年夏天，都會舉行荷花節，今年已經嚟到第19屆喇，仲係第三次獲得「全國荷花展覽」嘅承辦權，咁啱今年係祖國成立70周年，暨澳門特別行政區成立20周年，荷花節一定更精彩！即睇澳門荷花節有乜玩啦！
澳門一向有「蓮花寶地」之美喻，澳門嘅區旗同區徽設計，就係盛放嘅蓮花，仲有唔少地方以「蓮」命名，好似金蓮花廣場、蓮花大橋、蓮峰廟，又有蓮莖巷、蓮花徑等街名，望廈山更因為外形似蓮花，被冠以「蓮花山」之名，可見澳門同荷花有好深嘅淵源！
荷花又名蓮花，於仲夏盛放，出於污泥而不染嘅佢，係中國十大名花之一，清新脫俗，好得人鍾意！自2001年開始，澳門每年夏天，都會舉辦「荷香樂滿城－澳門荷花節」，今年已經嚟到第19屆，仲係澳門第三次取得「全國荷花展覽」嘅承辦權，第一次係2000年，澳門剛剛回歸，第二次係2009年澳門回歸十周年，今年2019年就係第三次，今次仲係祖國成立70周年，暨澳門特別行政區成立20周年，好有意義！今年嘅荷花節，一定更加盛大！
澳門荷花節有乜玩？除咗喺主要公園同旅遊點擺放幾十個品種嘅靚靚荷花，整個澳門各地亦會擺設約13,000盆荷花，仲有一系列以荷花做主題嘅活動，好似「歷屆全國荷花展覽回顧圖文展」、花藝展、荷花文化展覽、攝影展、工作坊同相關講座等等，有啲本地中式酒家仲會趁荷花節期間推出荷花宴，炮製荷香美饌，味道好清新！無論係鍾意賞花、影相抑或食嘅朋友，都記得唔好錯過荷花節喇！
澳門荷花出沒注意！五大展場一覽！
1 氹仔龍環葡韻
呢度係澳門荷花節嘅主要展場之一，今年將以「大唐盛世」做花展主題，以牌樓、唐三彩雕塑、華清池、驪山、西遊記皮影人偶同埋木製帆船等唐代設計元素，配合盆景荷花同其他植物，再配合埋主題花「濠江情」同其他荷花，呈現出大唐盛世時期的輝煌氣勢！呢個由五幢葡萄牙式住宅組成嘅博物館，一向是影相打卡勝地，博物館的前方，就有一個面積達69,000平方米的荷塘！經過多年栽培，呢度已成澳門最大的荷花生長地！
每年仲夏荷花盛開嘅時侯，就會出現壯觀荷花海，沿住荷塘散步，加上背靠葡式建築，好浪漫！呢度係澳門荷花節嘅主要展場之一，荷花節期間，仲會有《全國荷花展覽回顧圖文展》，同埋大型花藝作品《荷香滿塘-荷花花藝展覽》，由多位國外同澳門花藝家合力製作，結合現代裝置式架構同荷花插花，指定日子仲有供現場報名嘅賞荷生態遊，有興趣嘅唔好錯過喇！
2 盧廉若公園
公園建於19世紀，由富商盧華紹兒子盧廉若，按照蘇州園林格局打造，布局設計極具中國傳統特色，面積約一萬平方米嘅公園入面，有一廣闊池塘，每年夏天都會開滿荷花，萬紫千紅，沿住公園內九曲橋漫步賞花，再配埋公園內的亭台樓閣石山流水景色，好似去咗江南咁！春草堂入面仲會舉辦《荷香世界-第四屆澳門國際荷花雙年展》，邀請咗來自多個國家同地區嘅藝術名家參展，促進中西文化交流之餘，又可令大家對荷花、繪畫同澳門有更深嘅瞭解。想睇荷花品種，百步廊入面就有《荷香處處-荷花品種展》，展出約100種荷花品種，不同荷花在唐朝建築和近代中式古典園林中的美態。
3 塔石廣場
話明今年係「全國荷花展覽」，想睇全國不同地區嘅靚靚荷花，就要嚟塔石廣場！佢係澳門四大廣場之一，地面鋪滿葡式碎石，荷花節期間，會係中國各省市荷花展區，到時25個省、巿將按各自嘅區域特色，再融入荷花元素，建設唔同嘅荷花展區，一次過睇晒唔同地區嘅風土人情！
地址：澳門肥利喇亞美打大馬路
4 氹仔花城公園
去完龍環葡韻，掛住去官也街開餐，趕唔切去盧廉若公園？嚟到氹仔花城公園，都有中國式亭台樓閣伴荷花嘅景色俾你影相嘅，呢度面積約5,800平方米，規模比盧廉若公園細，不過卻係氹仔唯一嘅中國園林式庭園，入面小池塘種滿荷花，每到夏天就會盛開，再配上小橋、假山石景、百花亭同長廊景色，都係影相好地方！想攞多啲影相靈感，不如入去公園活動室睇睇《歷屆澳門荷花節攝影比賽得奬作品展》啦！
地址：氹仔埃武拉街
5 議事亭前地
除左各式庭園，荷花節期間，澳門政府都會喺好多大街小巷，甚至旅遊名勝擺置荷花盆栽，令成個澳門都荷香處處！就好遊客必到的議事亭前地，荷花節期間會放滿荷花盆栽，超特別！到時記得同呢個「荷花節限定版」嘅議事亭前地打卡喇！
info
第三十三屆全國荷花展覽暨第十九屆澳門荷花節
日期：6月3日至16日
地點：氹仔龍環葡韻住宅式博物館、盧廉若公園、塔石廣場展場、氹仔花城公園、議事亭前地、澳門紀念孫中山市政公園、氹仔中央公園、路環意度亞瑪忌士前地、石排灣郊野公園
網址：https://nature.iam.gov.mo/lotus2019/c/default
資料由客戶提供
UTravel熱門旅遊話題
＞免費入住新5星酒店 + 嘆精緻下午茶！＜
附搶飛連結🔗不再錯過演出消息‼️
