日本旅遊攻略
搭凌晨機雖然好攰，但又超興奮，離開羽田機場，我 依莉詩 就選擇立即出發去處處浪漫場景嘅橫濱！相信追開日劇或者真人版少女電影嘅朋友對呢個地方充滿幻想。無論係日劇《約會~戀愛是甚麼》、《逃避雖可恥但有用》，或是少女電影《狼少女與黑王子》、《L♥DK 鄰居同居》都係橫濱取景。
交通建議 – 即日來回買一日券
東京出名車費貴，點都要計下數！雖然橫濱距離東京一個鐘車程，不過車費一啲都唔平。所以如果即日來回的話，係新宿 或者 渋谷購買「JR橫濱一日券」比較低，¥1,160 (新宿出發) 或者 ¥860 (渋谷出發) 就包括東京都內 JR各站到橫濱來回各一次同埋 JR根岸線橫濱到新杉田站以及無限次乘坐橫濱市營巴士。而如果由羽田機場出發就可以係國際線客運大樓 2樓接機大堂內買巴士飛 (¥720)，半個鐘就直達橫濱。
當然買咗一日券可以無限次搭巴士遊走各個景點，但就算無買都唔使擔心，其實大部份景點同景點間只係五到十分鐘路程，唔太攰的話，慢慢行可以散下心，都幾輕鬆㗎！
▲ 如果唔想行得太辛苦，買定 東急港未來一日券 (渋谷: ¥860) 同 橫濱巴士一日券 (¥500) 就可以隨時上車到下一個景點。
第一站 – 歐洲風山手西洋館
第一站「山手西洋館」雖然同日劇無太大關係，不過據說係吉卜力電影《紅花坂上的海》嘅參考場景。因為橫濱係歷史上嘅重要港口，所以開港初期引來唔少洋人落腳聚居山手町一帶，而「山手西洋館」就係當中七座西式獨立屋連花園嘅統稱。歐洲風嘅大屋令人有種置身外國嘅感覺，加上當中幾間大屋都免費開放參觀，入面保留當時的傢俬及佈置，係一個不錯嘅影相地方。不過要提提大家，影相同時，屋內嘅傢俬部份係古董，如果寫著唔俾摸嘅就眼看手勿動啦！
▲ 七座西式獨立屋我並無全部去晒，只係揀咗幾間特別鍾意嘅。外交官之家係明治政府嘅外交官 – 內田定槌嘅私人住宅。1910年由澀谷搬移到呢度，好有歷史價值。
▲ 外交官之家入面被改成 Bluff庭園咖啡廳(ブラフガーデンカフェ) ，大家可以係青草同鳥聲間慢慢享受一杯咖啡。
▲ 而布拉夫18號館同樣具備歷數價值，1923年關東大地震之後係澳洲貿易商 Bowden 嘅住宅，米白、薄荷綠嘅配色清新，加上窗扇同鐵花台設計簡約宜人，充滿歐洲風情。
▲ 屋內大部份都保留了當時嘅古董傢俬，大家可以入內參觀，感受以前洋人嘅生活。但大部份都係星期三休館，想入去記得上網睇咗開放時間先啊！
山手西洋館
地址：神奈川県横浜市中区山手町
交通：JR「石川町」站下車
港灣未來線元町・中華街駅出口，再行上山
第二站 – 無馬的馬車道
一般人去完山手西洋館都會選擇行去附近嘅元町商店街同埋中華街，再直入山下公園。《逃恥》嘅美栗同小安都行過中華街呢！仲有《狼少女》恭也就係中華街同繪里香表白的啊！不過因為肚餓想搵嘢食，又唔想嚟到日本都食中國菜，所以我哋選擇咗搭車去馬車道。(無錯！係唔順路的)
馬車道嘅特色絕對唔少過中華街，係《 約 會 》依子同谷口一齊行過㗎！加上馬車道係 1867年建成嘅街道，兩旁建築都帶有濃濃歐洲色彩，就連街燈同路桿都有馬車圖案。而最重要係馬車道匯集咗唔少老字號餐飲店，下午時間梗係「搵食」最緊要啦！
▲ 馬車道中間嘅神奈川縣立歷史博物館係明治時期德國巴羅克建築之一，入面收藏咗浮世繪畫多達 7000 件，更係地理學、生物學、考古學、民俗學的綜合博物館。不過今次行程緊密並無入到去。
▲ 呢度就係《約會》入面依子同谷口一齊跑過嘅馬路口。
馬車道
地址：橫濱市中區常盤町
交通：港未來線馬車道車站 出站即是
第三站 – 日劇浪漫標誌摩天輪
沿馬車道一路行就會見到橫濱最浪漫嘅標誌 – Cosmo World 摩天輪！唔少日劇男女主角都係呢個摩天輪下錫錫呢！《鄰居同居》柊聖就係摩天輪下同小葵表白㗎啦！
雖然日頭經過無咗燈光轉變每氣氛大打折扣，不過因為起襯早去杯麵博物館無計啦！反正整個橫濱沿岸都會見到呢個摩天輪嘅！
▲ 沿路經過嘅公園如果櫻花滿開應該會好靚，可惜只差一點點時間同緣份。
橫濱宇宙世界
地址：神奈川縣橫濱市中區新港2-8-1
交通：JR「櫻木町」站步行10分鐘、港灣未來線港灣未來站步行2分鐘
營業時間：11:00～21:00※週六・週日、公休日為11:00～22:00（不同季節有所變動）
休息日：每周星期四
第四站 – 自製合味道杯麵
摩天輪旁邊就係日清杯麵博物館。雖然話香港上年都開咗間，不過難得嚟到梗係去整番個杯麵啦！同香港嗰個好唔同，入面分咗幾層真係超級大！除咗可以自製杯麵同公仔麵之外，仲有展覽區同互動區介紹麵嘅歷史同餐廳有人煮埋你食，小朋友又有室內遊樂場玩，一家大細可以玩足一日呢！
▲ 要 ¥500 入場費，整杯麵另計，起初都猶豫去唔去好，但入到去絕對唔會後悔，總在多嘢睇過香港嗰間太多了！
▲ 單單係呢個麵牆已經係香港嗰間 6-7 倍，真係咩麵都有呢！
▲ 展覽區一邊介紹麵嘅歷史，一邊有唔少影相位同互動裝置，唔會悶呢！
▲ 重頭戲當然係自製合味道杯麵啦！¥300 整一個，可以係 4種湯底揀一種，再由 12種食材選擇 4種。當中嘅雞雞同心心魚片係呢度獨有㗎！
杯麵博物館
地址：神奈川縣橫濱市中區新港2-3-4（神奈川県横浜市中区新港2-3-4）
時間：10:00 ～18:00（最後入館時間17:00）
休息日：星期二（星期二是公休日的話第二天休息）
費用：大人（大學生以上）¥500，高中生以下免費
第五站 – 休閒山下公園
整完杯麵，沿著海岸線走穿過紅磚瓦倉庫，經過象鼻頭公園，我哋先到山下公園尋找櫻花嘅蹤跡。櫻花只開了 5-6分，不過就有唔同嘅花壇，一樣好靚呢！
▲ 《約會》入面依子同谷口就係山下公園第一次見面。
山下公園
地址：神奈川県横浜市中区山下町279
交通：JR「關內站」徒步約20分鐘
港灣未來線元町・中華街駅出口「4」徒歩3分
時間：9:30～17:00 (7・8月延長至18:00)
第六站 – 文青氣息紅磚瓦倉庫
休息後再走到紅磚瓦倉庫。兩座暗紅色磚頭砌成的倉庫非常易認。二戰時期呢度用作存放軍用物資，後來變成當地政府嘅倉庫，宜家入面有好多特色商店、雜貨小店、餐廳，好有文青氣息，係活化建築嘅成功例子。入面仲有人氣鬆餅店「Bills」，相比表參道經常大排長龍，呢度唔使等咁耐呢！
▲ 《逃恥》入面平匡就係紅磚瓦倉庫奔跑呢！
▲ 《世界最難的戀愛》入面大野智演的社長亦揸車經過過紅磚瓦倉庫㗎！
紅磚瓦倉庫
地址：神奈川縣橫濱市市中區新港1-1
交通：JR「櫻木町站」或「關內站」徒步約15分鐘
港灣未來線「馬車道站」或「日本大通り」徒步約6分鐘
時間：1號館10:00 – 19:00；2號館11:00 – 20:00
同場加映1：橫濱港未來夜景
橫濱海濱景色醉人，是不少日劇浪漫情節的取景地。來到橫濱又怎可以不欣賞超美夜景呢？
同場加映2：橫濱中華街
橫濱中華街是亞洲最大唐人街，多達500間商店食店雲集於此。這裡中華氣息濃厚，除了品嚐到中華料理外，也可以看到中式建築，甚至連廟宇都有。如此熱鬧的中華街，與橫濱海濱形成極大對比，綜合來說果然是很值得去逛逛的地方！
UTravel熱門旅遊話題
↓立即登記參加！賺取無上限現金賞💰↓
↓即睇最新行程懶人包、爆紅打卡點🔥、必吃美食😋等↓
