秋涼微風海邊吹週末出遊舂坎角、大口環 | U Travel

澳門快閃遊

大灣區快閃遊

正在閱讀
秋涼微風海邊吹週末出遊舂坎角、大口環

秋涼微風海邊吹週末出遊舂坎角、大口環

文: U Magazine

2017.11.02

秋風起，最啱行山、BBQ、放風箏、露營、野餐…… 計我話，最緊要搵個好位，吹住海風感受秋日涼意。走遠啲去到南區郊遊，舂坎角公園可以對住海天一色靚景 BBQ，或者日落時在大口環的海邊走走！

#舂坎角公園驚濤拍岸看海

舂坎角公園分為兩部分，野餐區及燒烤區，前者乘坐小巴，直達終點站舂坎角慈氏護養院，行幾步即見，如到燒烤區，則需沿小斜路走多 5 分鐘。走到盡頭，半球體形保護罩正是英軍舂坎角二號炮床舊址。

舂坎角炮台於 1930 年興建，現在外貌依然保留，改建成公園後，圓形炮床加建幾組圓枱凳，供休憩之用，電影《烈火戰車》、《異度空間》也曾於舂坎角公園取景。

這裏平日人流不多，間中有跑友及單車友在此休息歇腳，自在地享受郊外清靜。

粉綠色炮床的樓梯、保護罩及窗口，絕對是打卡位。

公園內設野餐區及燒烤爐，對住大海 BBQ 係咪正先，不過附近冇小食店補給及洗手間，要 BBQ 認真要考慮清楚！

公園左面有一長長樓梯，拾級而下，海景超廣闊，如置身天涯海角，驟眼以為自己去咗外國 resort。

走到最底是探照燈座遺址，依拱形石壆看海超正，遠眺左面赤柱一帶豪宅，右見南丫島，心曠神怡，仲可以近觀浪花拍岸。

有興趣可沿路行至舂坎角沙灘同遊，路程約需半小時。順帶一提，前往舂坎角公園的小巴班次較疏，要留意回程班次。

下車點︰舂坎角慈氏護養院

舂坎角公園

交通︰於柴灣港鐵站乘坐 16A 小巴往舂坎角慈氏護養院，不過班次較疏，要留意回程班次。

#大口環日落往海邊走走

迷戀睇日落，但想靜靜地，唔想同人迫，可考慮去大口環。大口環，又稱沙灣，比西環再遠一點小海灣。攝影發燒友應該唔會陌生，石灘有一舊式人工搭建的碼頭，配合夕陽西下，海天一色美景，就算是手機隨意拍，呃 lik

入秋後，日短夜長，日落時間大概是 5:50pm，建議你 4:30pm 左右到沙灣徑運動場，先在沙灣道長堤路旁散步，或坐在長堤上看貨輪船穿梭港口，放空發呆。

沙灣道兩旁有樹蔭，不少人在此放狗，一直走可達香港大學綜合運動中心。

有人製作「土炮鞦韆」，不過勸大家唔好坐上去，唔太穩陣。

於長堤望向右，可見舊碼頭，你可由沙灣徑及大口環道交界的路口走入去，由於碼頭屬非正式，較簡陋及冇人管理，留意，對出正是大海，前往駐足睇日落，一定要「注意海浪！注意海浪！注意海浪！」，切勿為打卡影相走出，

舊碼頭為石灘，行走時要小心，亦要留意海浪及潮汐漲退。網上有見龍友，影到舊碼頭露出水面，那就要留意天文台的潮汐時間表，而且不宜天黑前往，因那邊沒有街燈照明。

要到舊碼頭，可由沙灣徑及大口環道交界的路口，走入去。

沙灣道長堤

交通︰堅尼地城港鐵站 A 出口，乘坐 58 號小巴，於麥理浩復康院下車，沿沙灣足球場訪小路往海傍。

文︰Eunice

攝︰Chow、Lok

UTravel熱門旅遊話題

【出遊必備】U Community社群送您tomtoc大容量旅行袋！↓
＞登記即送，人人有賞！＜

【Chill Guide旅遊指南😎】日韓台泰越深圳2025行程攻略✈️↓
↓即睇最新行程懶人包、爆紅打卡點🔥、必吃美食😋等↓