日本旅遊攻略
近幾年濟州島成為咗大家嘅新歡，自然景色同純樸嘅氛圍唔單止係韓國人嘅「後花園」，更加吸引咗世界各地嘅遊客，每年直綫上升嘅觀光人數促使韓國政府不斷改善島上嘅交通，今年 8 月底仲實行巴士路綫重組。一次過睇晒濟州交通全攻略，機場交通、市區巴士、跨區巴士、牛島渡輪，自由行就絕對無難度！
＃香港飛濟州島航班
飛濟州島通常有兩個方法，一係喺首爾金浦機場/釜山金海機場轉韓國國內綫飛濟州島，另外一個就係直飛濟州島---香港直飛濟州島嘅航班唔算多，但每日都有至少一班，如果搶到平機票亦都唔貴，大家可以多啲留意下機票消息。
＃濟州島上交通概覽
島上嘅公共交通工具得巴士，所以一定要買張 T-Money 或者 Cashbee，喺機場 7-11 就買得到，唔止濟州，喺韓國好多地方都用得到，就好似香港嘅八達通咁方便。(圖：naver)
你亦都可以揀用外國人專用嘅 M-Pass，M-Pass 分為 1、2、3、5、7日券，一日最多可以用 20 次，儲值咗之後除咗交通卡嘅功能之外，仲可以好似 T-Money 咁喺便利店同的士用嚟畀錢。
如果你要離開韓國或者唔再需要用到 T-Money 或者 Cashbee 嘅時候，你可以喺 GS25、CU、7-eleven、Mini Stop、Withme、Buy The Way 等等貼有標誌嘅便利店進行退卡，退款嘅時候會扣 500 韓圜手續費，再退還押金同餘額。
info
1/ T-Money & Cashbee：空卡 2,500 韓圜（2,000 韓圜押金，500 韓圜手續費）
2/ M-Pass：1日券/2日券/3日券/5日券/7日券價錢分別係 10,000 韓圜/18,000 韓圜/25,500 韓圜/42,500 韓圜/59,500 韓圜，除咗卡片費用，仲要畀 5,000 韓圜（4,500韓圜押金，500 韓圜手續費）
[巴士路綫重組]
| 車身顏色 | 類型 | 巴士車號類別 |
| 紅色 | 急行巴士 | 100 |
| 綠色 | 支綫巴士（市區） | 400（濟州），700（邑面） |
| 藍色 | 幹綫巴士（市外） | 200（一般），300（濟州市出發），500（西歸浦市出發） |
| 黃色 | 循環觀光巴士 | 800 |
路綫圖下載︰www.visitjeju.net
＃濟州機場至市區
濟州機場出市區共有 4 種方法：急行巴士、機場巴士、支綫巴士、的士。
1/ 急行巴士（紅色）
由今年 8 月 26 號起新開設嘅急行巴士，巴士號碼係 1 字開頭，紅色車身，共有 12 條路綫。由機場出發直達濟州島各大區，再沿原路返回機場，橫跨好幾區，大約一個鐘就可以繞行全島。但係站就比較少，只會停大站，有啲觀光景點就未必去到，而且急行巴士收費不同，由 2,000 韓圜起跳。
info
車費：2,000 - 4,000 韓圜（每 5 km 增加 500 韓圜）
搭乘處：機場入境大廳出口
2/ 機場巴士
機場巴士 600 號，途中會經過濟州島市區、中文觀光園區同西歸浦區。車上位置大，適合帶住大行李嘅旅客，車內有亦有中文廣播。（圖：sunny5396@naverblog）
info
車費：4,500-5,500 韓圜
班次：往市區 6:20am-10pm，往機場 6:20am-9:50pm（18-20 分鐘一班）
搭乘處：Gate5 出口 機場 2 號停車站
3/ 支綫巴士（綠色）
途經機場嘅支綫巴士有 400、465-2 號等等，可以直接去到濟州市外巴士站。市區巴士雖然平啲，但車上面就冇中文廣播，比較多韓國人搭，而且停嘅站成日會有變動，建議事前要做足功課，同埋上車前同司機確認咗先好搭。
info
車費：約 1,200 韓圜
搭乘處：Gate 2 出口 機場 1 號停車站搭車
4/ 的士
的士分為往濟州市區方向同往西歸浦方向，分為黑同銀兩種顏色，起跳價一樣。另外仲可以留意如果車身有紅、黃、綠條紋嘅的士，代表佢係 20 年以上無事故嘅優秀司機～（圖：Coral Hou）
info
車費：首 2 公里 2,800 韓圜，之後每 144米 / 35秒 100 韓圜
乘搭處：Gate 2 出口直行，面對停車場（右邊）往濟州市區乘車處，（左邊）往西歸浦區乘車處
＃市區交通
1/ 支綫巴士（綠色）
市區巴士主要是指在濟州市、西歸浦市中心及周邊郊區運行的巴士。濟州島交通重組後，市區巴士會改叫做支綫巴士，車身綠色。巴士路綫主要分為 3 大類：濟州市支綫 (巴士號碼 4 字頭)；西歸浦支綫（巴士號碼 6 字頭）；同邑面支綫 (巴士號碼 7 字頭)。
由於支綫巴士主要係畀當地居民乘搭，所以車上未必會有中文廣播，大部分司機亦剩係識講韓文，所以最好喺去之前將目的地嘅韓文寫或印定出嚟，到時俾司機睇就唔怕雞同鴨講啦。
（小編提醒：有啲巴士一日唔夠十班，有啲最夜九點就尾班車㗎啦，記得要查定站牌嘅時間表或者問吓巴士司機呀～）
info
車費：1,200 韓圜起價
2/ 黃金觀光巴士
由濟州市政府營運，途經各大必訪景點，例如係東門市場、黑豬肉一條街、新羅免稅店等等，車上面每個座位都配有耳機，入面有中英韓日四語導覽，站牌上面亦都有四語簡介，係專門為觀光客設立嘅巴士，咁就唔使怕搭錯車同蕩失路啦～
路綫：濟州歡迎中心→濟源公寓（寶健路）→THE 飯店 &Vegas 賭場入口→濟州市外巴士客運站→濟州市廳（光陽十字路口）→濟州 KAL 飯店入口→濟州民俗自然史博物館（濟州三姓穴）→濟州國際客輪站→濟州沿岸碼頭→東門市場→Ramada 飯店入口→觀德亭→西門市場→龍頭岩→濟州國際機場→樂天城市飯店入口→濟州道立美術館→ 漢拏樹木園→濟州 Grand 飯店入口→濟州歡迎中心
info
車費：成人 12,000 韓圜 / 六歲以上兒童青少年 10,000 韓圜（上車時界現金或用 T-Money 買飛，一日可以唔限次數咁搭）
行駛時間：8am - 8:50pm，每月第三個星期一公休
班次：每日 12 班，一個鐘一班，尾班車 7 pm
停靠站：循環巴士，22 站一循環，全程共一小時五十分鐘
官網：濟州島市區黃金觀光巴士 cn.jejugoldenbus.com
＃市外交通
1/ 幹綫巴士（藍色）
呢幾年隨住濟州島觀光興起，市外巴士綫亦都愈嚟愈多，巴士路綫重組後，會將市外巴士改做車身藍色的幹綫巴士。幹綫巴士共有 3 種：連接濟州市同西歸浦市的一般幹綫巴士 (巴士號碼 2 字頭)；由濟州市出發的幹綫巴士（巴士號碼 3 字頭）；由西歸浦市出發的幹綫巴士（巴士號碼 5 字頭)。
幹綫巴士嘅站點密集，遍及咗全島，一般嘅景點都可以到達。所以唔識揸車或冇咁多預算包車嘅遊客唔使擔心，出發前研究定濟州島巴士路綫圖就可以玩得又慳又開心！
想由濟州市區去其他區域，要先搭支綫巴士（市區巴士）去市外巴士站，再去櫃檯詢問買飛，或者直接上車嘟卡告知目的地就得。（圖：Coral Hou）
2/ 循環觀光巴士（黃色）
循環觀光巴士分成東西部地區的景點循環綫，分了兩個行車方向。810-1，810-2 號是東部地區循環綫，途經月郎峰、韓島樂園等；820-1，820-2 西部地區循環綫，途經 Hello Kitty 博物館、小人國主題公園等。（圖：cruiserlaw@naverblog）
3/ 自駕
遊濟州島最好嘅方式其實係自駕遊，如果有睇開韓國綜藝節目或者電視劇，唔難發現韓國人去濟州島旅行嘅時候都會傾向於自己揸車，好處係島上面有好多私房景點都係自駕遊去會方便好多㗎！（圖：Shutterstock）
除咗自駕遊之外，亦都有好多人會以包車嘅方式玩濟州島，一班好朋友出發除返開其實都唔算貴，仲方便好多～
＃往牛島
唔少人嚟到濟州島都會特別去牛島，牛島位於濟州島東南面，擁有韓國最靚海岸，由城山港出發搭渡輪去牛島天津港只係需要約 15 分鐘，島上面好細，交通係用單車、電動車或觀光巴士，適合輕鬆去 Hea 足一日，享受吓小島美景。
info
城山港地址：Seongsan-eup, 西歸浦市城山邑城山里
票價：
單程：成人 3,500 韓圜 /青少年（中學生以上） 2,800韓圜 / 小學生 1,000 韓圜 / 年滿 2 歲以上 700 韓圜
來回：成人 5,500 韓圜/ 青少年（中學生以上） 4,800韓圜 / 小學生 1,700 韓圜 / 年滿 2 歲以上 1,400 韓圜
Source：KKday
UTravel熱門旅遊話題
↓立即登記參加！賺取無上限現金賞💰↓
立即探索🔍最新熱門活動📍好去處推介🌟
