香港 3 大 VR 體驗館記者實試比拼

2017.08.18

打機玩 VR game（虛擬實景）並非新鮮事，美國同日本 hit 咗好耐，來到香港似乎終於成為熱潮喇！近日必玩有最 hit 嘅「超真實景密室逃脫遊戲體驗」，結合 VR 及 motion capture 技術，四人組隊打喪屍，號稱爆場兩個月；想有更多朋友一齊玩 VR game，有最多 8 人連線嘅「Omni VR」喪屍槍戰；想一次過玩百款 VR games，則可去銅鑼灣上樓體驗館。由《U Magazine》記者帶埋 model、攝影師實試，即睇邊間玩得最過癮！

01｜爆場！超真實景組隊打喪屍

特色：
－Hyper Reality（超真實景），眼罩之外仲要戴埋 motion capture 感應器
－一個遊戲（《屍森大宅》），最多四人同玩
收費：星期一至四 160 港元、星期五至日 180 港元
每節時間：45 分鐘

當虛擬實境（VR，Virtural Reality）體驗未能滿足你，一定要試 Hyper Reality（超真實景）遊戲體驗！銅鑼灣新開張的密室逃脫遊戲館 GloStation 有得玩，它是在 VR 體驗之上，結合 motion capture 技術，玩家的手腳四肢及道具槍上的球狀 sensor，會捕捉玩家全身動作，遊戲中完全睇到隊友攻勢及動作。有幾好玩﹖Model 試玩時尖叫聲四起就知，絕對刺激！整個體驗遊戲 30 分鐘，平時玩 VR 冇可能玩咁耐，眼會攰或覺太集中而不適，但在這裏不覺這問題，因你望到的影像及手腳動作一致跟足，不知不覺玩足半小時，仲有唔夠喉感覺！

各人都要背上小型 laptop 書包，機身連接着 Oculus 眼罩及耳機，不算太重。

另外，遊戲最大分別同好玩的地方，你可以觸摸實物，如與隊友交流，不只是作戰中對話，拍一下隊友膊頭，救佢一命翻生，表現 teamwork 精神。

最後 15 分鐘時間睇 playback，就是你盡情恥笑隊友的時間，亦解釋點解室內有綠牆，motion capture 系統可以真人 key 返去遊戲畫面，睇隊友玩遊戲時如何 chok 射擊 pose

超真實景密室逃脫遊戲體驗——屍森大宅
地址︰銅鑼灣謝斐道 468 號百達中心 16 樓
網址：glostation.com
面書專頁：glostationhongkong
人數需求︰3 至 4 人
費用︰星期一至四每位 160 港元、星期五至日及公眾假期每位 180 港元體驗時間︰60 分鐘（15 分鐘遊戲介紹及進入虛擬世界、30 分鐘遊戲時間及 15 分鐘返回現實世界及重播精彩時刻）
查詢︰3705 9338
註︰遊戲中不能配戴眼鏡，建議帶上隠型眼鏡進行遊戲，因為眼鏡容易損壞 VR 配件。

02｜高科技！8 人同步玩 Omni VR 槍戰

特色：
－在 Vurtuix Omni 萬向跑步器上遊走虛擬世界
－VR 遊戲共 19 款
－最多 8 人同步，適合與大班朋友一齊玩
收費：每位 160 港元
每節時間：30 分鐘

VR Arena 體驗館賣點是全港首間有 8 座 Vurtuix Omni 萬向跑步器，玩家可 360 度水平在 Omni上轉向，外人看來就是一班人原地跑呀跑，好似哈姆太郎咁搞笑！

做到真人步行方向及速度傳輸到遊戲系統，全靠玩家需穿穿上有感應器的專用鞋。當你踏在Omni 的「鑊」（凹面步行底座）內前行時，等於虛擬世界中前進，做出現實反應動作。

實試時發覺於「鑊」前進時要用力，需時間適應，退後行冇問題，遊戲系統亦感應到，試玩槍戰 VR game 更有真實感，攞住道具槍，加上腳力奔跑，手腳並用玩 5 至 10 分鐘係開始有啲攰。

VR 遊戲共 19 款，選擇的確多，單人有喪屍、槍擊、射箭、冒險食金幣、魔法師主題遊戲，多人對戰可選槍戰、佔領地盤、守護圍城等，介面顯示為簡體字，可能有啲唔慣，據知稍後有英文介面。

VR Arena KwunTong 體驗館
地址︰觀塘成業街 10 號電訊一代廣場 12 樓 D 室
面書專頁：vrarena.ablaze
時間：星期一至日 12pm - 12am
收費︰每位 160 港元 / 30 分鐘
（收費於遊戲開始時計算，體驗前職員教導如何在 Omni 萬步機上行走及簡單運作）
電話︰2617 6678