日本旅遊攻略
暑假是小朋友的世界，就算唔飛，留喺香港亦有好多好玩的酒店 package 可選擇，有啲仲有早鳥優惠，要訂快手喇！
Mr. Men Little Miss 主題房超吸睛
遊戲由朝玩到晚
黃金海岸酒店向來是不少家庭客喜愛的本地度假酒店，因為泳池大，玩嘅嘢多，暑假更加加碼。這個夏天，酒店大玩 Mr. Men Little Miss 主題，主題房成張床、窗簾、cushion、公仔都係熟口熟面的角色，小朋友被 Mr Happy、Little Miss Sunshine 等包圍，開心到爆。
唔入住主題房，character 一樣撞口撞面都係，酒店大堂周圍都係影相位。小朋友可以參加 Mr. Strong 名牌製作 workshop，又有尋找角色遊戲，最吸引的仲有濕晒身玩充氣水上滑梯、水槍，晚間仲有卡通時段及遊戲，真係玩嘅嘢太多時間太少！
住宿只包自助早餐，但可以優惠價享用自助晚餐，唔想食自助餐，酒店內外都有不少選擇。
特別一提，依家只要於 15/ 7 之前預訂，並於 31/ 7 之前入住，即可享 100 港元優惠。
香港黃金海岸
地址︰香港 屯門青山公路青山灣段 1 號酒店
查詢及預訂︰2452 8833
收費︰即日至 3/9，星期一至四 1,488 港元，星期五、星期日 1,888 港元，星期六 2,288 港元 ，入住 Mr. Men Little Miss 主題房每晚加 500 港元，費用包 2 位成人一位小朋友，額外小朋友入住加 380 港元。
紅磡新酒店
游 Infinity Pool 玩搖控賽車笨豬跑
想試新場的，可以考慮開業不久、位於紅磡的嘉里酒店。酒店臨海而建，標榜是城市度假酒店，今年暑假檔期，第一次推出 summer package。住客除了可以勁游 Infinity Pool 影下靚相，仲有好多小朋友活動，無限玩的有室內小型遙控車賽車和充氣笨豬跑，另亦有一次性的 workshop 讓兒童畫油畫及做創意手工。
Package 只包自助早餐，成人兩位及 6 歲或以下小童一位 (7至11歲小童享半價優惠)，不過強烈建議加 600 港元將自助早餐升級至自助晚餐，呢個 buffet 新場口碑唔錯，食物款式多，仲有好吸睛的分子 dessert bar，當然仲有靚靚夜景陪食。
香港嘉里酒店
地址︰香港 紅磡紅鸞道 38 號
查詢及預訂︰3069 9988 或電郵 reservations.khhk@thekerryhotels.com
費用︰即日至 30/8，收費 1,688 港元起，設加一
備註︰優惠僅限香港居民使用，須出示有效香港身份證﹔房價適用於兩位成人及一位小童入住，第二位小童將須收加牀費及遊戲費用﹔須於 8 月 30 日前預訂及入住方可享用優惠
經濟之選
千元左右住主題房
雖然住酒店小朋友已經好開心，但有得住主題房，小朋友興奮指數肯定 double up。荃灣這間酒店面對汀九橋，寧靜之餘仲有山景海景。這裡的主題房包括「遊戲王國」、「激鬥跑車」、「躍動音樂」等主題，留在房中都已經夠好玩。酒店仲特別於室內設賽道，俾小朋友玩揸車，上風馳電掣，另外亦有充氣彈床、搖搖船等，周末入住，仲有 workshop，教你整甜品。
提一提，酒店做緊 10 周年慶祝，於 2007 年出生的 10 歲小童入住酒店，可獲贈半磅生日蛋糕﹔其他客人惠顧餐飲，加 10 港元可享汽酒或橙汁， 每月 10 號生日的客人仲可享餐飲半價優惠。
帝景酒店
地址︰香港 荃灣汀九青山公路
查詢及預訂：(852) 3716-2898 / fb@royalview.com.hk
費用︰星期一至四 890 港元起，星期五及日 1,090 港元起，星期六 1,290 港元起，設加一
備註︰送沙灘玩具一套
文：Linus 相：Paul（香港黃金海岸）、其他相片：有關酒店提供
UTravel熱門旅遊話題
＞登記即送，人人有賞！＜
立即探索🔍最新熱門活動📍好去處推介🌟
