日本旅遊攻略
傳說地球上有十個死前一定要去嘅地方，其中一個就係荷蘭阿姆斯特丹嘅鬱金香花田。係地球人都知道，要睇靚靚鬱金香花海，梗係去庫肯霍夫公園（Keukenhof Garden）。除咗去公園，仲可以踩住單車吹住春風咁睇！重點係 4 月尾花期完結前前往，否則花開過後無艇搭！
眼都花 3 百萬朵鬱金香！
身為全球最大的鬱金香花園，佔地面積 32 公頃嘅庫肯霍夫公園，共有 600 萬株花，而鬱金香就佔咗一半數量，嚟庫肯霍夫公園睇花嘅好處，就梗係貪佢數量夠多，品種夠齊全，因為 300 萬朵鬱金香，包括咗 1,000 個品種，望望下都真係有啲眼花花。
淨係聽到呢兩個數字就知道要行晒成個公園都要好幾個鐘，如果想避開人潮影靚花，最好一早前來，因為旅行團一般都會下午出動。
園裡面有啲特別品種，好似有狗牙邊同埋荷蘭國旗顏色嘅鬱金香，如果喺花墟睇或者覺得佢多鬼餘，但係身在荷蘭咁睇，又覺得幾特別。唔止外國個月亮圓啲，原來連花都靚啲同香啲！
【延伸閱讀】【#瘋台灣】櫻花乜乜乜之將櫻花食落肚
【延伸閱讀】【#潮日放送】 得意企鵝陪你賞水中櫻
一般的鬱金香花田，在 4 月花季就只能見到鬱金香，但由於公園的花朵都是人工培植，所以荷蘭不同花期的花，如水仙、風信子等，都可以與鬱金香同時爭妍競麗。
[photo=116538
今年呢個場景都幾多人影相，有少少韓風 feel，唔怪得連韓妹妹都忍唔住留影。
點影都係明信片，真係手機都變單反。
除咗有花睇，遊人仲可以在園內親親小動物。
2018 年庫肯霍夫公園的開園時間為 3 月 22 至 5 月 13 日，早上 8 點至晚上 7 點半。而每年一次的大型花車巡遊，則定於 2018 年 4 月 21 日下午 3 點半，想睇嘅朋友記住唔好錯過喇！
交通方面可以由阿姆斯特丹中央火車站乘搭至 Lisse Station，車程約 35 分鐘。其實當地亦有類似「海洋公園式」嘅套票出售，即係巴士來回車費加埋入場券咁賣，成人套票約 245 港元，可以直接由阿姆斯特丹搭巴士到達庫肯霍夫公園，約每十分鐘就有一班巴士，車程都只係 20 至 30 分鐘，好似仲方便過搭火車。
雖然係鬱金香嘅花展，但係每年都會加入一啲荷蘭文化為主題，2017 年嘅主題係「荷蘭設計」，仲特別用花拼出抽象派核心畫家Piet Cornelies Mondrian 嘅畫作為主題花圃。唔識 Piet Cornelies Mondrian 唔緊要，因為你一定見過佢嘅大作，粗黑線條畫出一格格再塗滿紅黃藍白等色，對後代的建築、設計等影響很好深遠！
周圍都係 Piet Cornelies Mondrian 嘅畫作元素。
除咗可以在園內漫步外，亦可以選擇踩單車咁賞花，庫肯霍夫入園大門處可以租單車，單人車 10 歐元，雙人車就要 25 歐元。公園仲提供埋 4 條路線畀你揀，包你唔會盪失路！另外園內有好多河道，你又可以搭船仔遊公園，大人 8 歐元，小孩半價，當係買個特別嘅回憶都唔錯！
航拍花海
Wiebe de Jager @YouTube
Keukenhof Garden
網址：keukenhof.nl
地點：Stationsweg 166a , 2161 AM LISSE
電話：+31 (0)252 465 555
2018 年開放日期：3 月 22 至 5 月 13 日 8am 至 7:30pm
2小時鬱金香花田放題
去公園睇花的確又方便又多品種可以欣賞，但係如果想睇真正一望無際嘅花田呢，或者可以選擇自己踩單車去搵花田嚟睇。由北荷蘭城市 Haarlem 火車站，向南出發，途經 Heemstede、Hillegom、Lisse、Sassemhein 等，都會見到一大片嘅鬱金香花田，而終站會來到 Leiden，到時可以選擇搭火車返回出發地點 Haarlem。
Google 大神顯示踩單車完成路線唔使 2 個鐘，但要記住落車影相需時，如果鍾意影相嘅朋友，最好預早出發，備留多啲時間。不過其實晏咗都無所謂，因為可以由 Leiden 搭乘火車返去 Haarlem 或者直接返阿姆斯特丹，當然要留意返火車班次同埋行車時間啦！另外單車有可能要買火車票，最好先向職員查詢。最後溫提一下，遊花田同遊花園都一樣，要有公德心，唔好做採花賊呀！
UTravel熱門旅遊話題
↓主題追蹤人次突破二百萬!! 即刻重溫精彩時刻 ↓
↓即睇最新行程懶人包、爆紅打卡點🔥、必吃美食😋等↓
