日本旅遊攻略
去日本，當然係食好西，要食最新鮮海產，當然要去當地市場，如果你已經去厭築地、黑門、錦及函館朝市場的話，睇睇以下 5 個市場推介吧！
日本市場真係百去不厭，其實識得食，未必去最出名嗰幾個，日本仲有好多性價比勁高嘅市場，好似北海道二条市場的海鮮街、有「天然魚塘」之稱的富山新湊きっときと市、「平民廚房」金澤的近江町市場、食出日本在地味道的千葉勝浦朝市，以及河豚出產量最高的山口唐戶市場。每個都各具特色，真係難以取捨。
//延伸閱讀//
二条市場＠北海道
去北海道，有件事一定要做，就係食海鮮，除咗函館朝市，近近哋其實札幌都有。札幌市內有好多市場，但論交通最方便，一定係二条市場。由明治時代初期在石狩浜工作的漁民已將打撈到的海鮮攞去二条市場做買賣，所以呢個巿場歷史相當悠久。格局有點似東京的築地，由多間小店形成，而最受歡迎的海產必定是長腳蟹、大蝦及扇貝等等。市場內仲有好多試食位，可以食啱先買，某些店舖仲係即買即燒，保證新鮮。但千祈唔好食太飽，事關二条市場最出名是滿到瀉的海鮮丼，尤其係香港人最愛的海膽及大大粒魚子，配白飯，一絕！
睇啱畀錢後，店員仲會即場喺你面前拆蟹，即拆即食，真係隔住個 mon 睇都流口水。
（影片：bobolivetoeat@ig）
地址：札幌市中央區南 3 条東 1 丁目及東 2 丁目
營業時間：7am-6pm（市場），6am - 9pm（飲食街）
交通：地鐵南北線、東西線，在東豊線的大通站落車，行 15 分鐘
網址：http://sapporo-kankou.jp/spot/6/
新湊きっときと市場@富山
位於富山灣的新湊きっときと市場，其獨特的地形與寒暖流交匯的水域，最適合魚貝類繁殖的地方，有超過 500 多種類在此棲息，故有「天然魚塘」之稱。而新湊きっときと市場相比二条市場，雖然佔地比較細，但望落較乾淨，連丁點魚腥味都沒有，格局有點似台北的上引水產。市場內設有即睇即製服務，只要睇啱，等十幾分鐘就有得食。但識食，一定食蟹，新湊きっときと市場有齊日本各品種的蟹，多到你花多眼亂，生食網燒，悉隨尊便。如果運氣好，仲可以見到市場後面的魚欄，漁民將捕獲的蟹一隻隻整齊排開，場面壯觀。最後，記得買埋手信，好似昆布、魷魚絲、乾瑤柱等等。
不定時有劏魚表演及介紹。（source：toku608）
地址：934-0023 富山県射水市海王町 1 番地
營業時間：9am-7pm
電話：+81(0)766 84 1233
交通：從高岡站搭万葉線到東新湊站落車，行大約 10 分鐘
網址：http://kittokito-ichiba.co.jp/
近江町市場＠金澤
被稱為「近江平民廚房」的近江町市場，集合了石川縣一帶海域的新鮮海產及當地的蔬果 / 菜，是當地師奶最愛去的市場，而且價錢比其他市場平，好想食豪少少，海鮮丼 1000 日圓已經有交易，仲有人氣食品，好似曾經大熱的金箔軟雪糕，800 日圓就食到，平香港一半有多。近江町市場每個季節及月份都有唔同當造食材，好似 7 至 8 月有紅魷魚及生蠔、9 至 10 月就有松茸及甜蝦等等，只要配合月份去到，就食到又平又新鮮的海產，而且遊客不是太多，唔怕逼到唞唔到氣。
近江町市場有點似商店街，除咗有新鮮海產外，仲可以食 / 買到時令生果及無限乾貨，行一圈會令你放低唔少銀兩。（source：ハッピー体験 TV@YouTube）
地址：920 0907 石川縣金沢市青草町 88
營業時間：不定
電話：+81(0)76 231 1462
交通：從 JR 金澤車站行約 15 分鐘
網址：http://ohmicho-ichiba.com/portal/servlet/ohmicho.index?tm=183812309
勝浦朝市＠千葉
位在千葉南部的「勝浦朝市」是日本三大歷史最悠久的朝市，有成四百多年歷史。近海的勝浦朝市，有當日漁民新鮮捕獲的新鮮海產，好似龍蝦、鮑魚、不同種類的魚生，新鮮兼而價錢相當平，相比其他市場起碼平四分一有多。除海鮮之外，仲有好多當地人種植的蔬果、地道的手作料理及小食。勝浦朝市以不同大大小小的攤檔組成，感覺有點似大澳魚村，檔主大多數是可愛有活力的公公婆婆，來這裏完全感受到日本人的親切感。
在海上捕獲新鮮海產後，即買即處理，呢啲先叫最新鮮的食法。（source:01homeless@instagram）
地址：每月 1-15 日（下本町朝市通り），每月 16 日至月尾（仲本町朝市通り）
營業時間：6am-11am（逢星期三及 1 月 1 日休息）
交通：JR 特急若潮號（東京站去勝浦站約 1 小時車程）
網址：http://www.city.katsuura.lg.jp/forms/info/info.aspx?info_id=29165
唐戶市場＠山口
如果有冒險精神，一定要到唐戶市場試試河豚刺身，呢個市場的河豚出產數量，可謂全日本第一，而且價錢比其他市場平起碼三分一有多，試吓無妨。唐戶市場除咗有河豚食，魚市場還設有直賣部門，即是師奶或阿叔都可以買到批發價海產。不但如此，對吃貨來講最吸引就係平到喊的新鮮壽司及海鮮丼；壽司每件由 50 日圓起，全是市場新鮮海產，而海鮮丼都只係 1000 日圓起跳，分量大到兩個人都未必食得晒，仲有好多海產類乾貨買，價錢都係平過甚他市場㗎！
UTravel熱門旅遊話題
贏走題樂園門票、酒店Staycation及人氣產品
↓立即登記參加！賺取無上限現金賞💰↓
