日本旅遊攻略
相信好多人去到日本，都一定會想見下日本最出名嘅富士山，但作為一個凡人，其實只得 2 個方法，一：離遠望、二：飛機睇！雖然遠望富士山都好靚，但若然可以安坐飛機上睇呢座名山的話，更分分鐘會睇到平時睇唔到嘅嘢－－富士山山口。
// 2017/05/10 更新！//
早前與攝影師早前出差，回程時乘東京羽田機場返港航班 CX549 下午 4：25，起飛時間太陽仲未落山，於是網上預辦登機揀定右邊窗口位坐，睇下係唔係真係睇到富士山。點知右邊窗口位真係勁搶手，我哋只係搶到一個「67 K」座位，實測係點？
坐右邊窗口位嘅攝影師金睛火眼，起飛後約 15 分鐘就發現富士山啦！去片：
實測證明，東京返港航班機上右邊窗口位真係睇富士山，但係清唔清、有冇雲海就睇運氣啦。不過我哋呢程機嘅機長冇就「富士山」做廣播，所以建議起飛後睇實屏幕「飛行路線圖」就最穩陣。
記住：「香港飛東京，揀坐左邊窗口位；東京返香港，揀坐右邊窗口位」
（飛成田或羽田都唔影響睇富士山。）
採訪：小窮維琪
攝影：Ray N
留意三大關鍵
1/ 有日光
「我係搭 2：45pm 飛機返香港時睇到，自己最建議係日頭機同由成田返香港，不過最終睇唔睇到都係要睇彩數。」
（編按：由於富士山天氣極唔穩定，但通常朝早或中午嘅天氣較少雲霧，好彩的話可以睇曬成座到富士山，但 Tonii 呢個有雲海襯托的富士山，又有另一種美感。）
2/ 靠右坐
「同地勤要求坐靠右窗口位。」
（編按：由成田返香港途中，飛機會經過富士山，建議選座位時除了要靠右外，還要坐機頭至中間位，因為咁就唔會畀機翼遮擋視線。）
3/ 關鍵時間
「起飛後約 20 分鐘捕捉。」
（編按：由成田返香港，起飛後約 15 - 20 分鐘左右飛機就會經過富士山，呢個時候就要金睛火眼望實窗口，睇下見唔見到，雖然有時機艙都會有廣播叫乘客睇，但並唔一定每班機的機長都會咁做，所以還是靠自己最好。）
圖： Tonii Fung 、IG：takahiroadachiguideservice
UTravel熱門旅遊話題
＞ 簡單留言，即有機會免費得到！＜
↓立即登記參加！賺取無上限現金賞💰↓
