日本旅遊攻略
近年首爾高質烘焙店及麵包店各有特色，吸引大量本地及外國客人排隊都要朝聖！今次麵包控小編為大家搜羅首爾8間爆紅麵包店，除咗有大家耳熟能詳嘅Artist Bakery外，仲有聖水洞熱門鹽麵包店、大熱MBTI麵包等，麵包控又係時候出發首爾開展麵包巡禮啦～
1. Seongsu Baking Studio
首爾近期最紅麵包店非聖水洞呢間「Seongsu Baking Studio」莫屬，主廚曾代表韓國贏得麵包世界盃冠軍，更上過綜藝節目《劉QUIZ ON THE BLOCK》！主打每日現烤各國特色麵包及貝果，必食冠軍傳統「法式長棍麵包」，仲有「蔥奶油乳酪貝果」、「鹽麵包」都係唔少網民推介必食之選！
地址：首爾城東區首爾林2街46地下一樓
交通方式：首爾地鐵「首爾林站」4號出口步行約5分鐘
2. 自然島鹽麵包 (자연도 소금빵)
每次小編經過聖水洞呢度，都會聞到撲鼻而嚟嘅鹽麵包香！呢間人氣鹽麵包店可以喺首爾、釜山都買到，主打用100%加拿大高級小麥、法國奶油及海鹽製成嘅「鹽麵包可頌」。全店只賣鹽麵包，網民表示無論係新鮮出爐定放凍後唔加熱都好食，唔怪得聖水洞街上人手一袋啦！
地址：首爾城東區聖水洞2街321-74
交通方式：首爾地鐵「聖水站」3號出口步行約5分鐘
> “LoklokCook” 直擊分享聖水洞神級鹽麵包有咩咁勁<
3. Standard Bread
去聖水洞行街，好難唔被門口呢個經典呆萌表情巨型吐司吸引住！熱門吐司品牌Standard Bread主打每日新鮮出爐生吐司，木系簡約裝潢配上歐式庭園主題，成件事係勁療癒！社群U Creator推介必食現做「鐵板法式吐司」及「千層麵包」，撕開一層時好似撕紙巾一樣，無論打卡定味道都係滿分～
地址：首爾城東區聖水洞2街273-53
交通方式：首爾地鐵「聖水站」3號出口步行8至10分鐘
4. Artist Bakery
身為麵包控，你就算未食過都一定聽過呢間位於安國站嘅「Artist Bakery」！作為「London Bagel Museum」嘅姊妹品牌，佢主打多款極具創意口味嘅鹽麵包及法棍。店內裝修走歐美復古藝術風，每個角落都超打卡able！人氣爆款包括「青蔥奶油乳酪鹽麵包」、「松露鹽麵包」及「伯爵茶鹽可頌」。建議出發前先喺Catchtable提前訂位，慳返好多排隊時間！
地址：首爾鐘路區栗谷路45
交通方式：首爾地鐵3號線「安國站」1號出口
> “hkeateateat” 分享Artist Bakery必點不踩雷麵包款式<
5. Ugly Bakery
嚟到望遠洞點可以唔食呢間人氣麵包店「Ugly Bakery」～佢以皮薄多餡嘅麵包聞名，更係韓國「猛獁包」始祖，近期因登上烘焙實境節目《天下烘焙》而人氣再度急升！必食開心果味猛獁包、伯爵茶忌廉包，網民甚至形容拎上手有如炸彈般有份量感！
地址：麻浦區世界盃路13街73號1樓
交通方式：首爾地鐵6號線「望遠站」2號出口
6. Cafe Onion
人氣Cafe「Onion」分別於聖水洞同安國都有分店，不過聖水店偏向工業風格，而安國區就行韓屋風格。除咗可以打卡外，店內更主打多款現烤麵包、咖啡及甜品，必點招牌「雪山麵包」表面灑滿如雪花般嘅糖粉，另外「紅豆奶油麵包」及「酥脆牛角酥」亦係店內熱門名物！
地址：首爾鐘路區桂洞146-1
交通方式：首爾地鐵3號線「安國站」3號出口
>即睇 “Applechong” 介紹人氣Onion必點麵包款式<
7. Sorimsa (소림사)
位於龍山區嘅人氣烘焙麵包店「Sorimsa (소림사)」主打外皮酥脆內裡軟Q嘅鹽麵包，採用法國高級牛油及英國皇室指定海鹽製作，就連歌手姜珉炅、演員柳演錫都大力推介過！必食「鹽味牛油包」，小店更推出各種禮盒組合，買返香港做手信就最適合！
地址：首爾龍山區漢江大路15街9 105
交通方式：首爾地鐵「龍山站」步行約7分鐘
8. What a Bread
韓國近年將「MBTI」玩到極致，呢間位於HYBE娛樂公司附近嘅美式復古麵包店就緊貼潮流推出「MBTI麵包」一炮而紅！分別有各款MBTI字母麵包，最特別就係每款字母麵包都有唔同嘅口味體現唔同個性，如巧克力、抹茶、開心果口味等等，玩味十足而且打卡一流！
地址：首爾龍山區漢江大路3街40-642
交通方式：首爾地鐵1號線「龍山站」
*以上麵包店、Cafe之營業時間、每日出爐時間、限定口味僅供參考，一切以店家當日現場實際供應為準。
圖片來源：IG帳戶@seongsu_baking_studio、@standardbread_official、@saltbread.in.seaside、@what.a.bread、@uglybakery、社群U Creator@LuoLing0517、@Applechong、@跳跳虎、@hkeateateat、@Juliana Chan、@LoklokCook
🔔 Follow《U Community社群》Instagram 同讚好 Facebook 專頁，睇更多U Creator品牌活動招募丶送禮丶緊貼最新美食丶旅遊打卡熱話或創作者流量密碼教學等。
UTravel熱門旅遊話題
↓主題追蹤人次突破二百萬!! 即刻重溫精彩時刻 ↓
