日本旅遊攻略
每次入住陌生的酒店房間，坊間一直流傳「尾房最猛鬼」、「鞋子不能放整齊」等說法，到底孰真孰假？玄學大師陳定幫親自拆解5大旅遊風水迷思，更驚爆「尾房不一定最陰」，另一種房間格局原來殺氣更大！跟著陳定幫師傅學懂入房正確步驟與自保法寶，一招提升個人陽氣，避開所有靈異危機！
旅遊風水迷思｜1. 酒店不能住尾房？
陳定幫師傅指住尾房的陰氣不一定特別重。從風水角度而言，走廊兩邊的房間沒有問題，不過長走廊盡頭對住的房間就是「路沖」，師傅直言「特別容易出事，嗰啲房最大殺氣。」再加上在形態上，長長的走廊就好像一枝槍，槍頭正對住的尾房就正中「槍煞」，「如果係兩邊側邊都叫好啲。」
陳定幫師傅解釋，古人認為長巷，一路行，越行越入去就越聚陰，越聚陰就越容易碰到陰，即係話越容易見到鬼。
酒店住尾房解決方法
如果尾房位置少人出入，陽氣較弱可以如何解決？師傅表示如果房間可以照到陽光，「其實就無乜嘢存在尾房一定係最陰。」但如果房間無窗無陽光，又或者「個尾房一行到尾，望出個窗，佢乜都無，係望到大廈同大廈之間嗰種空隙位，咁就可能會陰一啲喇。」
解決方法一：
外遊攜帶護身物品。
解決方法二：
提升自己的陽氣。例如你已外出曬了一整天太陽，陽氣就已足夠。更重要的是你的心態與能量，心情開心正面，就不會受侵擾。
旅遊風水迷思｜2. 入酒店房前要敲門？
針對入酒店房前應否敲門，網上有兩種睇法，一種就是先敲門通知「朋友仔」有人要入內，請祂們先躲好；另一種看法就是敲門通知「朋友仔」要入住，有種知會對方要入侵衪們的領土，且不容拒絕，可能會讓靈體更生氣。
陳定幫師傅表示自己都有入酒店房前敲門的習慣，「因為敲門呢個動作，就係可能入面有好多『朋友仔』，咁你話畀佢聽我哋準備入嚟喇。即係等佢哋好似……又唔係話趕佢哋走，就係等佢哋有時間可能係離開下，或者等佢哋唔好去騷擾你，就係咁樣。」師傅認為既然做一步簡單動作，又無傷大雅，為什麼不多做一步呢？
入酒店房前敲門做法
師傅建議大家入住酒店房內敲門，這是一種尊重，不過無需提名自己的姓名，「你話『我嚟借宿一宵』或者『喺呢度住兩晚』，然後話畀佢哋聽，之後入住，咁你都安心啲，有禮貌啲。」
旅遊風水迷思｜3. 鞋子是否要放整齊？
網上流傳一種講法，睡覺的時候，鞋子不要整齊擺放在床邊，因為有機率會讓靈體知道床上面有人，然後就順住方向搵上門。師傅表示自己外遊多年，「我啲鞋放得整齊，或者我嘅家人放得整齊，都係無太大問題嘅。」所以撞鬼與鞋履擺放整齊，並沒有必然關係。
酒店房擺放鞋子做法
幫幫師傅認為「信則有，不信則無。」他認為如果外出一天到處走，鞋子已污糟了，「其實係唔應該踩入屋才對。」至於要擺放整齊抑或亂放，沒有一定規矩，按自己喜好習慣即可。
旅遊風水迷思｜4. 鏡子忌對著床
陳定幫師傅解釋，陽宅風水亦不建議鏡子對床，「已經有心理學有認證過，會令到人神經衰弱。」不過導致神經衰弱的原因只是鏡子的倒影令你誤以為有人望住你，就會嚇一嚇。
床尾對住鏡子解決方法
至於鏡子招陰一說，師傅補充「會有少許，只能夠話有少許。因為鏡係一啲好特別嘅嘢，因為鏡係彷彿好似一個異度空間咁樣。」不過旅客無需擔心，因為短住幾天影響不大，除非住一星期、兩星期、三星期，「可能就精神上面可能會出現少許影響。」
旅遊風水迷思｜5. 如何出遊自保？
外遊時可以帶些護身物品，以大白傘蓋佛母卡為例，可以擺放在床頭邊或床頭櫃。如果想隨身攜帶，則可以放在銀包或手機殼內，注意不要褻瀆、不要用來墊食物、不要壓到小卡。師傅表示選擇護身物品上，可以令你安心才是就最重要。
UTravel熱門旅遊話題
贏走題樂園門票、酒店Staycation及人氣產品
附搶飛連結🔗不再錯過演出消息‼️
