日本旅遊攻略
去到大阪點可以唔食燒肉！大阪心齋橋一帶美食雲集，行街行到攰想搵間燒肉店擦餐勁，咁您就要望入嚟！小編今次整理出心齋橋、道頓堀一帶7間人氣燒肉名店指南，當中包括Tabelog高分名店、高性價比燒肉套餐、無限時任食和牛等等，燒肉控記得要睇落去啦！
➤立即下載U Lifestyle App
➤詳情懶人包
【😋社群請您食】Oliver's Super Sandwiches全新餐牌！
吃貨想食得健康又想保持 Fit 爆身材，Oliver's Super Sandwiches 「Eat to Fit」新餐牌就滿足到您嘅願望！選用低 GI 米、高蛋白蕎麥麵及天然羅漢果糖等健康食材，仲有助增肌效果！即日起至2026年3月3日，簡單登記就有機會免費搶先試，健康零負擔！
大阪心齋橋燒肉推介｜1. 燒肉左近
親子遊大阪首推位於道頓堀拉麵名店「金龍拉麵」附近嘅「燒肉左近」，因為可以無限時任食黑毛和牛，而未滿6歲嘅小朋友只需¥600（約HK$31）！黑毛和牛放題價錢約¥5,200/位成人就可以黑毛和牛食到飽，輕鬆歎黑毛和牛大判燒、霜降黑毛和牛、和牛牛舌等多個部位，另外仲有較平價嘅基本燒肉放題及神戶牛燒肉放題，燒肉控大把選擇！
地址：大阪府大阪市中央區道頓堀1-4-22 2樓
交通方式：近鐵日本橋站難波Walk出口
> “asheryuen2019” 分享高CP值黑毛和牛燒肉放題親子體驗<
大阪心齋橋燒肉推介｜2. 黑毛和牛 善
如果您想一餐滿足燒肉、Shabu Shabu同壽喜燒三個願望，咁就一定要食呢間「黑毛和牛善」！餐廳位於心齋橋筋商店街入面，行街行到攰入去休息下補充能量就最啱！和牛放題套餐最平HK$220就可以食到，按照個人喜好選擇食法，3人以上同行仲可以加多一種食法，套餐另加HK$30仲可以飲品任飲，絕對係性價比之王！
地址：大阪府大阪市中央區心齋橋筋2-3-15戎橋Northビル 3F
交通方式：難波站步行2分鐘
大阪心齋橋燒肉推介｜3. 燒肉割烹 YP流 西心齋橋店
心齋橋有間儀式感滿分嘅燒肉店，超適合同另一半或親朋好友慶祝生日！「燒肉割烹 YP流」喺大阪有多間分店，而且一共接受過7次電視採訪，每年接待上千組慶祝活動！除咗可以歎海膽、和牛之外，仲有和牛高湯茶泡飯、里脊肉炸豬排三明治等特色美食。生日專屬套餐仲有甜品｢蛋糕寶箱｣，打開蛋糕寶盒後煙霧瀰漫，打卡一流！難怪Tabelog有接近3.6高分！
地址：大阪市中央區宗右衛門町1-12地下一樓
交通方式：地鐵心齋橋站步行5分鐘
大阪心齋橋燒肉推介｜4. 黒毛和牛一頭買い焼肉
「黑毛和牛一頭買い焼肉」總店位於道頓堀，以嚴選A5黑毛和牛而聞名，燒肉控一定唔可以錯過呢間高質燒肉店！總店共有3層，以吧台、較高私隱度嘅和室座位及卡位種類劃分，無論您想慶生、搞party、或者只係想安靜聚餐都適合。而且您仲可以一餐食盡9種唔同油花比例嘅黑毛和牛稀有部位，被稱為「去大阪一定要食嘅燒肉店」唔係冇原因！
地址：大阪府大阪市中央區道頓堀1丁目5−8 Shibata.Bld, 2F
交通方式：難波站14號出口步行5分鐘
> “Moon Rabbit” 分享A5黑毛和牛燒肉名店詳細食評 <
大阪心齋橋燒肉推介｜5. 燒肉力丸
心齋橋仲有一間出名高性價比嘅燒肉店「燒肉力丸」都大受網民推介。就算叫最貴嘅和牛set，連飲品及酒精放題，圍返開都係HK$300幾輕鬆食到飽！社群U Creator形容啲牛就算冇特別調味，淨係點少量鹽已經好好味。必點火炙和牛壽司，會有專人喺客人面前現燒，實現視覺、嗅覺、味覺三重享受！
地址：大阪府大阪市中央區道頓堀1-9-1 ベルスードビル5F
交通方式：大阪地鐵御堂筋線心齋橋站步行3分鐘
大阪心齋橋燒肉推介｜6. 燒肉㐂舌
經過道頓堀法善寺一帶唔好錯過呢間Tabelog百名店「燒肉㐂舌」，分別於南船場及法善寺設有分店。主打精心熟成黑毛和牛，選用松阪牛及霧島牛，並直接由產地直送，保證肉質鮮美。社群U Creator形容黑毛和牛臀肉入口即溶而且油脂均勻唔會過膩，配埋特製醬汁同生蛋黃食，口感層次豐富！小編寫到呢度已經準備好著兩條褲去大阪食！
地址：大阪府大阪市中央區道頓堀1-7-12
交通方式：難波站步行5分鐘即可到達
> “Bigmouth_jai” 分享道頓堀人氣燒肉名店必點之選<
大阪心齋橋燒肉推介｜7. 焼肉無雙武藏
另一間喺Tabelog有3.64高分嘅「燒肉無雙武藏」同樣出色！比起遊客，就連當地人收工聚餐都會選擇呢間燒肉店，可見餐廳受歡迎嘅程度有幾高！招牌生牛肉及牛舌係唔少網民推介必點之選，生牛肉他他搭配麻油香同蛋，賣相已經夠吸引。社群U Creator——Eatwithyannes就點咗牛舌、和牛同牛腸，即刻睇下真實食評！另外提提大家如果想食到靚牛又唔想白行一趟嘅話，就一定要提早網上預訂啦！
地址：大阪府大阪市中央區東心齋橋2-6-19
交通方式：心齋橋站步行約8分鐘
**價錢及菜式僅供參考，詳情請查閱各餐廳官網。
招募U Creator l 出Post賺額外收入！
立即登記➡️ https://ulapp.hk/ldcg3
🔔 Follow《U Community社群》Instagram 同讚好 Facebook 專頁 ，睇更多U Creator品牌活動招募丶送禮丶緊貼最新美食丶旅遊打卡熱話或創作者流量密碼教學等。
圖片來源：網上圖片、社群U Creator@asheryuen2019、@yan yan、@brownlyeat、@Moon Rabbit、@vswl vienne、@Bigmouth_jai、@Eatwithyannes
UTravel熱門旅遊話題
↓主題追蹤人次突破二百萬!! 即刻重溫精彩時刻 ↓
附搶飛連結🔗不再錯過演出消息‼️
