日本旅遊攻略
去旅行除咗行街、食嘢、探索當地獨有風景之外，去動物cafe近距離親親小動物都係一個唔錯嘅選擇！日本動物cafe種類多元，除咗有常見嘅貓貓狗狗咖啡廳之外，仲有好多香港見唔到嘅小動物，如貓頭鷹、刺蝟主題等等！今次小編精選7間網民認證高質體驗嘅東京動物cafe，即刻睇落去啦！
【Plan行程神隊友】
輕鬆成為旅行Chill Guy 「Chill Guide旅遊指南」為您整合社群最人氣旅遊攻略！有齊日本、深圳、台灣、澳門、 韓國、泰國、越南同其他熱門旅遊地區嘅行程懶人包，plan行程唔使左搵右搵，輕鬆做chill guy！
東京動物Cafe｜1. 吉祥寺Petit村
作為貓控嘅您去東京絕對唔可以錯過呢個好地方！東京「吉祥寺Petit村」以歐式童話村為主題，集合咗精品店、cafe、餐廳於一身，而且無論係建築定店舖全部都有貓貓嘅影子，簡直係一條貓系童話村，貓奴一定超幸福！而貓cafe就有2層高，可以邊歎咖啡、茶、輕食，邊同貓貓玩，令呢個小區成為東京熱門「貓星人」景點！
地址：東京都武蔵野市吉祥寺本町2-33-2 吉祥寺プティット村
交通：JR「吉祥寺站」步行約5分鐘
入場費：1000日圓至1800日圓不等
東京動物Cafe｜2. 薩摩耶cafe moffu
如果您係狗派，想體驗同一眾大型犬一齊玩，您一定要去東京原宿竹下通新開張嘅「薩摩耶cafe moffu」！呢間日式和室裝修嘅cafe裡面有10多隻雪白軟綿綿嘅薩摩耶店長迎接您，呢個畫面齋睇相已經覺得療癒！而且店內設有拍照區，您可以輕鬆同薩摩耶天使互動合照，適合每一位親子同情侶去放鬆下！
地址：東京都澀谷區神宮前 1-6-9 Om169大廈
交通：JR原宿站竹下口步行2分鐘
入場費：3,800日圓 (互動及無限暢飲) 線上預約傳送門
官網：https://samoyedmoffu.com/en
東京動物Cafe｜3. 土撥鼠村マーモット村
土撥鼠memes就睇得多，估唔到喺東京真係可以近距離打卡真正嘅土撥鼠！位於中野區新開張嘅「土撥鼠村 (マーモット村) 」係日本第間土撥鼠主題動物cafe，亦都係全日本唯一可以近距離睇「喜馬拉雅土撥鼠」嘅地方！雖然cafe仲未開放客人擁抱或近距離接觸體驗，但客人可以加200日圓親自餵食土撥鼠，親眼睇土撥鼠認真咀嚼嘅可愛模樣~
地址：東京都中野區野方4-46-10
交通：JR中野站步行7分鐘
入場費：1,500日圓 (20分鐘) /2,800日圓（60分鐘）
官網：https://mamomura.com/
東京動物Cafe｜4. HARRY HARAJUKU TERRACE店
想近距離接觸超萌水獺，東京就有一間人氣水獺cafe「HARRY HARAJUKU terrace」唔單止可以同水獺互動，而且連龍貓、刺蝟、兔仔都有得睇，而且全部都可以同佢哋互動，一次過滿足您多個願望！入場包含一杯飲料，分別有室內同室外2個區域，您仲可以加購飼料同水獺握手餵食，全程超療癒！
地址：東京都澀谷區神宮前 4-26-5 神宮前 426 大樓3樓
交通：JR原宿站竹下口步行10-15分鐘
入場費：3080日圓起 (60分鐘) (不含餵食、互動體驗)
官網及預約連結：https://harinezumi-cafe.com/en/store/harajuku-terrace/#
東京動物Cafe｜5. 若林の家
同樣位於原宿竹下通區仲有一間水獺cafe「若林の家」，唔同「HARRY HARAJUKU TERRACE店」有唔同種類小動物，「若林の家」只有水獺，如果想專注同水獺玩嘅您就可以去體驗下啦！一入場就會見到10多隻活潑嘅水獺迎接住您，50分鐘盡情近距離餵食水獺，見到咁可愛咁親人嘅水獺真係會唔捨得走！
地址：東京都澀谷區神宮前1-6-8ローリエビル地下1階
交通：JR原宿站竹下口步行約5分鐘
入場費：3,100日圓 (50分鐘) (連餵食、互動體驗)
官網：http://otter.tokyo/
東京動物Cafe｜6. ふくろうの里
喺日本，貓頭鷹有「祈福平安」及「智慧」嘅象徵意義，因此日本人對貓頭鷹情有獨鍾。今次要介紹嘅係東京其中一間人氣貓頭鷹cafe「ふくろうの里」，位於東京原宿區！店內面積唔算大，約有8隻貓頭鷹，當中仲有白白淨淨嘅「白麵貓頭鷹」！您可以點一杯咖啡慢慢同貓頭鷹玩，或者餵食互動，同唔同品種嘅貓頭鷹一齊收獲愉快又難忘嘅一天！
地址：東京都澀谷區神宮前1-21-15 原宿ATMビル4F
交通：JR原宿站竹下口步行約1分鐘
入場費：1,500日圓起
官網：https://www.owlvillage.jp/harajuku.html
東京動物Cafe｜7. Alpaca fureai land
位於新宿嘅「Alpaca fureai land」係東京唯一可以同草泥馬互動嘅場所，除咗可以入圍欄撫摸、餵食草泥馬之外，仲可以親自幫佢哋梳毛整理同合照，全方位同可愛嘅草泥馬互動。咁樣仲未夠，您仲可以提前預約加購，帶園內草泥馬外出散步，親身體驗做羊駝主人嘅樂趣！
地址：東京都新宿區市谷岩戶町 19-1 5屋ビル 102
交通：都營大江戶線牛込神樂坂站步行 1 分鐘
入場費：1,000日圓至1,500日圓
官網：https://alpacaland.tokyo/
💡注意事項：親親小動物同時，拍攝記得關閉閃光燈，以免嚇到小動物！
🔔 Follow《U Community社群》Instagram 同讚好 Facebook 專頁 ，睇更多U Creator品牌活動招募丶送禮丶緊貼最新美食丶旅遊打卡熱話或創作者流量密碼教學等。
-----------------
✈️招募旅遊U Creator l 出Post賺旅費！
立即登記➡️ https://ulapp.hk/j9kzn
-----------------
圖片來源：官方圖片、IG帳戶@owl_village_fromharajuku 、@samoyedcafe.moffu 、社群U Creator @兩腳大貓怪 、@小沐 Virgo 、@要擺脫月光族標籤的小夜、 @女生暢游天下 、 @ssannie
#ULifestyle應用程式 #ULifestyleApp #社群 #UCreatorHK #TRAVELwithUCreator #MOMENTSwithUCreator #100個港人旅遊攻略 #100個港人推介親子好去處 #親子好去處 #情侶好去處 #動物Cafe #東京動物cafe #室內好去處 #東京
UTravel熱門旅遊話題
↓主題追蹤人次突破二百萬!! 即刻重溫精彩時刻 ↓
↓即睇最新行程懶人包、爆紅打卡點🔥、必吃美食😋等↓
