關楚耀與老婆巴黎度蜜月嬌妻浴袍look凱旋門前曬長腿

2025.03.12

歌手關楚耀（Kelvin）與KOL老婆Joann早前到冰島及芬蘭度蜜月，之後就飛往法國巴黎旅行。Joann今日在IG曬出之前去巴黎由老公操刀影的相，她在酒店露台擺拍，背景就是凱旋門。

Joann連日來都分享旅行照及影片，直言是「Full time traveler」的她，今日曬出在酒店露台擺拍的相片，背景就是凱旋門。相中Joann以浴袍look現身，擺出各個pose，又大曬超幼長腿。老公關楚耀問：「Did u eat the breakfast ? （你有冇食早餐？）Joann回覆：「you ate that all. Because it’s colddddddd （你食晒，因為啲食物凍晒）」

點擊圖片放大

豪住芬蘭酒店

Joann分享在芬蘭住了兩晚的酒店，酒店有落地大玻璃窗，可以望到出面冰天雪地，畫面非常漂亮。她亦把握了當刻靚景瘋狂打卡，身穿灰色緊身衣的她，除了騷出S型纖瘦身材外，亦大曬長腿。她留言指這間酒店是全個honeymoon最貴：「因為book咗呢間酒店先造就成北歐之旅。第一件事book咗呢間酒店先訂機票同plan 其餘行程。但這裏真的完美符合我對芬蘭的一切幻想，玻璃望出去仲有馴鹿經過。」她又表示酒店一晚5位數，包早晚餐，問網友：「你們來芬蘭會住嗎？」

點擊圖片放大

冰島零下5度浸溫泉

Joann早前在IG曬出在冰島浸溫泉的相片。相中她穿上泳裝，曬出事業線、玉背及纖瘦身材，非常有睇頭。相中她更攬住老公關楚耀合照，留言：「落住冰雹浸溫泉都係第一次！頸以上零下五度，身體40度，難！而家聽到冰島呢個名都驚呀，暴風雪前夕它曾經是美麗的⋯」網友紛紛大讚兩公婆夠晒sweet！

點擊圖片放大

兩夫妻冰島遇驚險意外

關楚耀曾在小紅書分享與老婆在冰島遇意外，帖文題目為「冰島現況，大家注意安全。」他表示：「體驗到冰島30號風球暴風雪威力，成部車門吹反咗獨自留在車廂，用盡全身氣力掹住車門等待救援。暴風雪實在強得驚人，老婆要爬入去搵人救我，大家都體會到大自然的威力，現在我們安全更加珍惜所擁有的一切，多謝兩位冰島本地人仗義幫忙＋@Realjoann」。

點擊圖片放大

片中可見，關楚耀身穿黑色雪褸，地上有厚厚的積雪。他說：「發生意外啊，架車！嘩好恐怖呀！我老婆一開門，啲風大到不得了，成道車門反開咗，而家係完全閂唔到門呀！嘩，好凍好凍，啲冰封船，我而家係拉住到門，好彩頭先有個外國人幫手幫手，攞緊啲架罉嚟整道門，希望順利，我哋而家安全嘅，不過呢幾日喺冰島嘅朋友真係要小心，因為超級暴風雪來臨呀！」

點擊圖片放大

形容是「死裡逃生」

關楚耀又以「冰島開車‧老司機也害怕」為題發出post，他表示今次是「死裡逃生」：「在冰島準備自駕的朋友真的真的真的要小心，特別是在冬天的時候天氣反差太大，幸好自己有10年在雪地開車的經驗，不然大家真的要考慮到底要不要在冰島自駕遊，全程有老婆陪着給我信心辛苦你了 @Realjoann #冰島 #度蜜月」。

老婆Joann日前亦發文：「少d雪地經驗都搞唔掂，每日又要趕住天黑前（大概17:30）返酒店。自從第二日爭啲吹甩咗道門，啲風暴警告由黃色轉橙色，今日紅色🚨，我哋已經cut晒啲景點，因為越夜路況越差，係大風到你無法想像，一路揸架車係搖㗎，真係好驚吹反！辛苦老公保住我條命，真係好恐怖，有幾下，如果控制得唔好真係會☠️」而兩夫妻今日（7日）在社交網報平安，指兩人已離開冰島，轉戰芬蘭。