外遊Safe Trip必讀！一文了解旅遊業賠償基金5大要點

文: PM

2024.03.15

每年復活節長假期都係外遊旺季，加上正值春天賞花季節，唔少人都計劃好返內地或去日韓台等地旅遊、賞花，盡情享受春日帶來嘅生氣同活力。旅途上，從日常繁忙嘅生活走進色彩繽紛嘅花海美景之中，讓身心獲得療癒之餘，仲可以瘋狂影相打卡，同朋友分享美景同旅途上嘅樂趣。

想有個完整又圓滿嘅旅程，除咗要一早安排好行程住宿外，記住一定要將「旅遊保障」都準備埋喺計劃之內！為了更安心出遊，唔使擔心喺旅途上遇上意外又得唔到保障，喺購買旅遊服務組合時，記得要搵持牌旅行代理商，同時亦應了解清楚旅遊業監管局（旅監局）管理嘅旅遊業賠償基金（賠償基金）所涵蓋嘅保障範圍同保障條款；以下羅列出嘅5大要點懶人包，助你一手掌握保障要點，讓你盡情享受每個旅程時刻！

旅行社倒閉？旅遊意外？旅遊業賠償基金讓你安心外遊

無論參加旅行團抑或自由行，除了旅程愉快，當然最希望能出發得安心又放心。而旅監局係根據《旅遊業條例》（第634章）於2020年1月成立嘅法定監管機構，主要負責有關旅行代理商、導遊和領隊嘅發牌及規管事宜，同時負責提升旅遊從業員嘅誠信、能力和專業水平；並規管入境旅行團在安排下光顧的商店。

自旅遊業新規管制度喺2022年9月1日全面實施，旅監局根據《旅遊業條例》（第634章）從前旅遊業賠償基金管理委員會接管關於持有、管理和運用賠償基金嘅權力，賠償基金嘅目的係為外遊旅客喺因持牌旅行代理商倒閉而損失外遊費及外遊發生意外時提供特惠賠償。所以，無論報團或自由行，只要係合資格嘅外遊旅客，都同樣受旅監局管理嘅賠償基金保障。

即刻為大家列出5大要點，輕鬆掌握保障內容：

第1點：電子印花徵費係咩嚟？點樣查核電子印花徵費是否有效？

根據《旅遊業條例》（第634章）第146條，持牌旅行代理商負有法律責任，需要就每筆已向外遊旅客收取咗嘅外遊費，向旅監局繳付相等於外遊費全數0.15%嘅印花徵費。喺持牌旅行代理商繳付印花徵費後，旅行代理商所發出嘅收據上就會見到印咗一個清晰顯示徵收金額同日期嘅電子徵費印花。

例如，如果你俾咗旅行代理商$12,000港元購買香港至西安機票連當地酒店住宿套票，張收據上嘅電子徵費印花就應該顯示已繳交$18港元嘅印花徵費，就好似下面嘅圖樣咁。如大家俾咗外遊費後發現收據上無電子徵費印花、電子印花模糊不清、印花徵費額不足（少於已付外遊費全數嘅0.15%）或者收據和印花上所載嘅旅行代理商名稱和其牌照號碼跟所光顧嘅旅行代理商不符，就要記得叫你哋幫襯嘅旅行代理商糾正返呀！

至於大家如果想查核收據上嘅電子印花徵費係咪有效，除咗可以透過旅監局電子印花徵費系統嘅網頁（https://elevy.tia.org.hk/），亦都可以用智能電話或平板電腦掃描電子印花上面嘅二維碼（QR Code）。

第2點：購買咩外遊服務先會喺收據上蓋上電子徵費印花？
根據《旅遊業條例》（第634章），外遊旅客指已向持牌旅行代理商支付外遊費購買關乎同一次旅程嘅任何以下各段描述嘅兩個或多於兩個服務及安排嘅外遊服務組合：

(a) 關涉在旅程中以任何交通工具提供的載運服務，該旅程在香港境內開始，而其後主要在香港境外進行；

(b) 關涉在香港境外的住宿的服務；

(i) 並非附屬於(a)或(b)段所述的服務；
(ii) 在香港境外進行；及
(iii)（如該服務組合包括該活動）構成該服務組合的主要部分。

持牌旅行代理商需要向外遊旅客發出蓋上電子徵費印花嘅收據

根據以上嘅定義，旅客如果向持牌旅行代理商購買以下任何一類嘅旅遊服務，相關收據就唔會蓋上電子徵費印花：

單獨購買機票、船票、巴士票的交易；
單獨購買酒店住宿的交易；
購買並沒有指明將用於兌換全部或任何兩項外遊服務組合的預付式旅遊禮券或旅遊現金券的交易。

第3點：持有已蓋上電子徵費印花收據嘅外遊旅客，可以獲得賠償基金什麼保障？

如持有已蓋上電子徵費印花嘅收據，外遊旅客可以獲得賠償基金兩類嘅保障：

損失外遊費嘅保障：喺外遊旅客購買外遊服務後持牌旅行代理商倒閉嘅情況下，賠償基金可以為受影響旅客提供所損失外遊費90%嘅特惠賠償（按照簡化程序提出的申請所涉的最高款額為$15,000港元）。
喺外遊活動中遇上意外傷亡嘅保障：如果萬一唔好彩，外遊旅客喺持牌旅行代理商提供或舉辦嘅外遊活動中意外傷亡，係可以得到總數達$300,000港元嘅特惠賠償以報銷當地醫療、殮葬/遺體（包括骨灰）運返香港，以及親屬因旅客傷亡而往訪當地所招致嘅實際開支，每類有關開支都有最高嘅款額。