安心外遊必睇旅遊業賠償基金5個要點

文: PM

2023.10.20

踏入年末，全球各地開始迎接景色分明嘅秋冬季節，秋楓嘅紅黃交錯、冬天嘅純白浪漫，再加上聖誕新年呢啲大日子，無論去邊旅遊氣氛都特別好。想盡情享受旅遊嘅樂趣，任何時候都不能忘記安心外遊嘅重要性！其實大家從訂機票同酒店呢啲旅遊產品果一刻起，大家嘅旅程可能已經受到保障！想知萬一外遊遇上突發狀況應該點處理？點樣先可以玩得更安心？就要多多了解旅遊業監管局（旅監局）管理嘅旅遊業賠償基金（賠償基金），睇咗以下5大要點，再好好計劃，到時盡情暢遊世界各地打卡。

旅遊業賠償基金為旅客提供保障助你安心外遊

無論你想去邊度賞紅葉同過聖誕新年，當然希望每個旅程都可以出發得安心又放心。旅監局管理嘅賠償基金保障合資格嘅外遊旅客，讓你輕鬆無憂享受旅程！旅監局是根據《旅遊業條例》（第634章）喺2020年1月成立嘅法定監管機構，主要負責有關旅行代理商、導遊和領隊嘅發牌及規管事宜，同時負責提升旅遊從業員嘅誠信、能力和專業水平，以及規管入境旅行團在安排下光顧嘅商店。而賠償基金喺1993年成立。自旅遊業新規管制度喺2022年9月1日全面實施，旅監局根據《旅遊業條例》（第634章）從前旅遊業賠償基金管理委員會接管關於持有、管理和運用賠償基金嘅權力，賠償基金的目的係為外遊旅客喺因持牌旅行代理商倒閉而損失外遊費及外遊發生意外時提供特惠賠償。現在就好好了解賠償基金嘅5大要點，準備出發！

1) 電子印花徵費係咩嚟？點樣查核電子印花徵費是否有效？

根據《旅遊業條例》（第634章）第146條，持牌旅行代理商負有法律責任，需要就每筆已向外遊旅客收取咗嘅外遊費，向旅監局繳付相等於外遊費全數0.15%嘅印花徵費。喺持牌旅行代理商繳付印花徵費後，旅行代理商所發出嘅收據上就會見到印咗一個清晰顯示徵收金額同日期嘅電子徵費印花。

例如，如果你俾咗旅行代理商$12,000港元購買香港至杭州機票連當地酒店住宿套票，張收據上嘅電子徵費印花就應該顯示已繳交$18港元嘅印花徵費，就好似下面嘅圖樣咁。如大家俾咗外遊費後發現收據上無電子徵費印花、電子印花模糊不清、印花徵費額不足（少於已付外遊費全數嘅0.15%）或者收據和印花上所載嘅旅行代理商名稱和其牌照號碼跟所光顧嘅旅行代理商不符，就要記得叫你哋幫襯嘅旅行代理商糾正返呀！

至於大家如果想查核收據上嘅電子印花徵費係咪有效，除咗可以透過旅監局電子印花徵費系統嘅網頁（https://elevy.tia.org.hk/），亦都可以用智能電話或平板電腦掃描電子印花上面嘅二維碼（QR Code）。

2) 購買咩外遊服務先會喺收據上蓋上電子徵費印花？

根據《旅遊業條例》（第634章），外遊旅客指已向持牌旅行代理商支付外遊費購買關乎同一次旅程嘅任何以下各段描述嘅兩個或多於兩個服務及安排嘅外遊服務組合：

(a) 關涉在旅程中以任何交通工具提供的載運服務，該旅程在香港境內開始，而其後主要在香港境外進行；

(b) 關涉在香港境外的住宿的服務；

(i) 並非附屬於(a)或(b)段所述的服務；

(ii) 在香港境外進行；及

(iii)（如該服務組合包括該活動）構成該服務組合的主要部分。

持牌旅行代理商需要向外遊旅客發出蓋上電子徵費印花嘅收據

根據以上嘅定義，旅客如果向持牌旅行代理商購買以下任何一類嘅旅遊服務，相關收據就唔會蓋上電子徵費印花：

單獨購買機票、船票、巴士票的交易；
單獨購買酒店住宿的交易；
購買並沒有指明將用於兌換全部或任何兩項外遊服務組合的預付式旅遊禮券或旅遊現金券的交易。

3) 持有已蓋上電子徵費印花收據嘅外遊旅客，可以獲得賠償基金什麼保障？

如持有已蓋上電子徵費印花嘅收據，外遊旅客可以獲得賠償基金兩類嘅保障：

損失外遊費嘅保障：喺外遊旅客購買外遊服務後持牌旅行代理商倒閉嘅情況下，賠償基金可以為受影響旅客提供所損失外遊費90%嘅特惠賠償（按照簡化程序提出的申請所涉的最高款額為$15,000港元）。
喺外遊活動中遇上意外傷亡嘅保障：如果萬一唔好彩，外遊旅客喺持牌旅行代理商提供或舉辦嘅外遊活動中意外傷亡，係可以得到總數達$300,000港元嘅特惠賠償以報銷當地醫療、殮葬/遺體（包括骨灰）運返香港，以及親屬因旅客傷亡而往訪當地所招致嘅實際開支，每類有關開支都有最高嘅款額。