日本旅遊攻略
擁抱我的天空之鏡
Hmm...ok...烏尤尼鹽漠，最大的鹽漠，天空之鏡，世界第一絕景，最接近天堂既地方…對佢既嚮往係由幾時開始？好難講得準確...大既係因為以前經常係會議室裡面望著窗外D雲太耐掛! (澄清一點唔係無心工作，只係有關加埋無關既會實在太多，經常要困獸鬥)，簡單D講就係驚呢種囚牢式既生活唔知要維持幾耐，要轉變不如就辭職停落黎！
就係咁2013年出現左第一次六個月既環遊，跟一般環遊世界既旅人一樣，都會將焦點集中係D所謂wonders度，咦！玻利維亞簽證好難攪喎，BNO又過左期，咁咪唔去囉，又冇乜野大不了，咁就開始一路行，泰姬陵、佩特拉、馬丘比丘…之後去到秘魯Lake Titicaca個Taquile Island上面，已經可以離遠望到玻國既太陽島，過門而不能入頓時覺得有D若有所失，後悔點解唔攞番本BNO試下闖關呢? 都黎都門口囉，世界第一絕景喎? 就係咁呢種遺憾就跟左我兩年。
到左二次環遊前期準備時已經申領左BNO，下定決心諗住智利關入唔到就去阿根廷關再試，但忽然又話特區可以係玻利維亞鄰國辦到簽證，都好，唔洗博博下，結果都係聖地牙哥簽到，過程亦頗順利。去到San Petro de Atacama報左團，因為之前聽過太多關於呢種三日兩夜過境團既負面訊息，例如司機飲醉酒呀、食物中毒呀、高山反應等等…所以選擇團時亦冇乜特別要求，只求平安到步。
無要求結果得出黎都唔差，司機團友都好友善，最重要係其中一個德國團友識西班牙文可以同司機溝通到。其實第一二日行程大多數都係睇D火山同埋高山湖。過程就有少少辛苦啦，一來要克服高反，又有時刮起大風沙，耳鼻口都係沙，食住都係好簡單(其實唔會有乜胃口)，第一晚重冇涼沖lup住訓。
第三日終於到左天空之鏡，最期待既畫面係好震撼，一望無際的白色表面加上低低既雲，係有種置身係天堂，遠離煩塵既感覺。因為之前好耐都冇落過雨，已經打定輸數冇鏡睇。問我有冇覺得遺憾? 有架，人生點會無遺憾，但係我能夠放下擁有既一切，走出舒適區，親身體驗大自然既奇妙，已經覺得好幸運。旅行就係要懂得放下，希望能夠帶著心裡既一面天鏡，走得更高更遠。Anyway，今次既任務已經屬於超額完成。
圖片及原文刊載自 二次環遊 Facebook專頁《擁抱我的天空之鏡》
本篇圖文獲作者授權刊登，未經許可，請勿轉載。
UTravel熱門旅遊話題
↓立即登記參加！賺取無上限現金賞💰↓
↓即睇最新行程懶人包、爆紅打卡點🔥、必吃美食😋等↓
